Ginang gitigbas patay, bana 'sikop

CEBU, Philippines - Naglunang sa kaugalingong dugo ug wala nay kinabuhing naabtan sa iyang mga higala ug kabanay ang 38-anyos nga ginang nga giingong gitigbas sulod sa payag niadtong Biyernes sa alas 5:00 sa hapon sa sitio Anopog, barangay Dumlog dakbayan sa Toledo.

Ang namatay giila sa kapolisan nga si Wilma Omanya, manindahay’g “ice buko” nga taga barangay Landahan sa nahisgutang dakbayan kinsa nakaangkon og mga samad tinigbasan sa ulo, liog, ug ubang parte sa lawas. Gisikop usab sa kapolisan ang bana niining si Maximiano Omanya human dunay mga testigos nga mitumbok nga kini ug ang biktima nakit-ang nag-away diha sa payag sayo nianang adlawa.

Si SPO2 Henry Acosta, imbestigador sa kapulisan sa dakbayan sa Toledo nagkanayon nga giingong nagsininggitay ang duha ug nabatiang midangoy-ngoy ang babaye nga daw gipasakitan ug kalit dayong nahilom.

Nianang pagkahapon gisusi sa mga silingan ang payag ug mao nalay ilang nakit-ang patay na ang ginang.

Ang bana sa biktima wala na igkita diha sa lugar human sa pagkadiskubre sa patay’ng lawas apan kagahapon sayo sa buntag nadakpan kini diha sa balay sa igsuon sa biktima sa barangay Magsaysay uban sa iyang mga anak ug apo.

Ang suspek mipasangil nga ang ‘kabit’ sa iyang kapikas maoy posibleng mipatay niini.Nakuha ang sundang diha sa crime scene nga may gitas-on nga 18 pulgadas ug tubo nga 24 pulgadas nga gituohang maoy gigamit sa pagpatay.

Ang suspetsado nga nahinabi sa estasyunang DySS mihimakak sa maong pasangil kay didto ra siya sa ilang panimalay sa barangay Landahan atol sa hitabo.

Matud pa niini gipahibalo nalang siya pinaagi sa tawag sa cellphone maong iyang gikuha ang iyang mga anak nga babaye nga minyo diha sa barangay Gaas sa Balamban, dayon midiretso sila sa punerarya.Sumala pa niini dunay daghang mga karelasyon ang iyang asawa gani ang iyang 22-anyos nga anak babaye, mga igsuon, ug ang igsuon sa iyang asawa nakahibalo niini.

Sumala pa niini nga matag semana ra nga mouli sa ilang panimalay ang iyang asawa kay didto kini magpuyo sa nahitaboan. (Guam Logroño)    (BANATNEWS)