CEBU, Philippines - Patay ang usa ka 42-anyos nga lalaki human kini unaya pagpusil sa iyang kainom nga igsoon sa iyang kapuyo niadtong Huwebes sa hapon diha sa Regner Compound, barangay San Isidro, dakbayan sa Talisay.
Ang biktima mao si Albert Francisco, taga 3rd Avenue, Reclamation Area, dakbayan sa Sugbo nakaangkon og samad pinusilan sa likod nga bahin sa iyang ulo ug wala na makaabot nga buhi sa Talisay City District Hospital.
Ang suspetsado mao si Jessel James Cala, 32, residente sa nahitaboan apan daling nakaikyas human sa hitabo.
Sila PO3 Mikie Espina ug PO2 Stephen Sefuesca mibutyag nga si Francisco, Jessel ug ang duha ka igsuon sa suspetsado nga sila si Albert ug Susan maoy nag-inom diha gawas sa balay sa pamilyang Cala.
Matud pa ni Espina sa Banat News nga magsuroyan ang biktima diha sa mga igsuon sa iyang kapuyo nga tua magtrabaho sa Amerika.
Gikatahong mitumaw ang panaglalis dihang wala pahulma sa biktima si Jessel og P700 nga ibayad sa purchase order (PO) niini ug human niini misulod ang suspek sa balay dayon sa pagbalik nagbitbit na kini og pusil dayon gipusil si Francisco.
Dugang pa ni Espina, base sa gibutyag sa mga igsuon sa suspek drug dependent ang naulahi ug walo palang ka bulan dihang nakagawas kini sa rehabilitation center.
Gawas pa niini, kanunay na kining manghasi ilabi na kun mahubog ug makaupat nang napriso sa Talisay City Jail, sumala pang Espina. - Brenda Batuto (BANAT NEWS)