Bata nanghagad og shabu sa agents sikop

CEBU, Philippines - Usa ka 14-anyos nga batang lalaki ang gidakop sa mga ahente sa Philippine Drugs Enforcement Agency (PDEA-7) human kini manghagad sa iyang mga gibaligyang shabu niadtong Huwebes sa hapon sa barangay Poblacion lungsod sa Cordova. Ang tigpamaba sa PDEA-7 Jesie Tabanao mibutyag nga ang ilang mga kaubanan mipahigayon og buy bust operations batok sa usa ka inilang ‘parok’(pusher) sa nahisgutang lugar nga si Joselito Macan, 42.Si Tabanao nagkanayon nga si Macan nadakpan hinuon uban sa iyang paryente nga si Donde Macan, 20, ug Rico Biongco, 30, lakip na ang 14- anyos human sa transaksyon.

Matud pa ni Tabanao ang mga ahente mipalit og tulo ka paketeng shabu diin si Rico maoy nakig-estorya kanila ug human mabayri gidunol sa naulahi ang kwarta kang Joselito, samtang si Donde na maoy midunol sa shabu hinungdan sa ilang pagkasikop.

Samtang ang minor de edad gidakop usab kay giingong atol sa negosasyon nila sa mga hamtong nga drug pushers nagpunay usab kini og panghagad kanila nga sa iyaha nalang mopalit.

“Miduol ang 14-anyos mipakita sa tulo ka paketeng shabu ug nihagad nga adto palit sa iya kay pareha lang daw ang presyo pero daghan og sulod,” sumala pa ni Tabanao. – BANAT NEWS