CEBU, Philippines - Napugos ang Department of Environment and Natural Resources (DENR) pagpasuspenso sa operasyon sa usa ka tire recycling firm kon himoanan og mga ligid sa trak sa lungsod sa Compostela human sa daghang mga reklamo sa mga molupyo sa maong lugar.
Ang mga molupyo sa maong lungsod una nang midangop sa konseho aron ireklamo ang paghatag og permit ni Mayor Ricthie Wagas sa Union Tyre Philippines nga nagbase sa maong lungsod.
Matud sa reklamo sa mga residente nga nakahatag og grabeng kaabog sa palibot ug baho sa sunog sa guma matag adlaw ang maong pabrika nga miresulta sa lainlaing sakit.
Tungod niini, napugos ang DENR pinaagi sa ilang legal officer nga si Fernando Alberca pagpatawag sa tagdumala sa Union Tyre Philippines nga girepresentahan ni Luzviminda Taboada ingon man sa mga sakop sa konseho nga gipangulohan ni Bise Mayor Joel Quinio ug Konsehal Tessa Cang ug mga kaubanan sa milabay’ng adlaw.
Didto gikumbinser ang maong kompaniya nga temporaryong mohunong sa operasyon pending sa gihimong eksaminasyon pagtino unsa ka peligro sa panglawas ang mga hugaw ug baho gikan sa maong kompaniya.
Hinuon, nagdumili unta pagsanong ang maong kompaniya tungod kay giinsister niini nga lehitimo ang ilang operasyon tungod kay giisyuhan sila og business permit ni Wagas.
Apan wala kini mosaler human usab gipasabot sa mga sakop sa konseho nga dili mahimong isakripisyo ang kahimsog ug panglawas sa mga molupyo sa ilang lungsod nga daghang gipanghilantan ug gipang-ubo tungod sa polusyon nga gidulot sa pabrika. - Darrel A. Carumba (BANAT NEWS)