Tulisan namaak na-depressed diay

CEBU, Philippines - Giingong tulisan nga namaak sa polis giingong gumikan kini sa depression ug nalisoan sa saktong panghuna-huna matud ni PO2 Stephen Sefuesca sa Talisay Police Station Intelligence Operatives nga maoy napaakan.

Napaakan si Sefuesca sa suspek nga si Alex Ursal, suspetsado sa pagpanulis ug pagpanigbas sa usa ka drayber sa habal-habal nga si Nesto Carlos niadtong Martes sa gabii diha ilawom sa flyover sa Tabunok.

Si PO2 Sefuesca nga nahinabi kagahapon sa Banat News mibutyag nga siya ug ang asawa ni Ursal nag-abot sa tambalanan ug giingnan nga naguol og maayo ang suspek tungod sa pagkataktak niini sa trabaho.

Bugtong pangabuhian nila mao nalang ang pagpamaligya og isda sa kapikas sa suspek ug gumikan sa kagamay sa abot sagad mapasaran sila og kaon maong nakaapekto na kini sa pangisip sa suspek.

Niadtong Martes sa buntag dihang gikatakda na unta silang mobalik sa Medellin si Ursal nakig-istorya sa iyang duha ka anak apan nabantayan sa asawa nga mosimang na gyud ang gipanulti, nianang pagkahapon milakaw kining walay pananghid.

Mao nalay nahibaw-an niyang napusilan kini nila ni PO2 Sefuesca ug PO3 Mikie Espina dihang kalit niining gipanggot ang maong mga polis, giingong bisan paman sa tulo ka samad pinusilan sa paa namaak pa gihapon ang suspek.

Niadtong Martes sa hapon si Ursal ang gipasakaan og kasong “direct assault” ug robbery hold-up with violence against or intimidation of person” diha sa Talisay City Prosecutor’s Office. – BANAT NEWS