'Tulisan' nasikop sa papa sa gitulis

CEBU, Philippines - Usa ka 27-anyos nga lalaki kinsa giingong tulisan ang nasikop sa amahan ug sa mga silingan sa ilang gitulis nga babaye kagahapon sa buntag diha sa south coastal road habig sa sitio San Rafael, barangay Tanke, dakbayan sa Talisay.

Ang biktima mao si Junalyn Emnace, 19, residente sa nahisgutang lugar kinsa nakuhaan sa iyang cellphone apan nasikop ug nakulatahan dayon ang gitumbok nga suspek nga si Chino Aguilar taga Alumnus, barangay Mambaling, dakbayan sa Sugbo.

Nakaeskapo usab ang kauban niining si Juno Baguio, dala ang cellphone sa biktima.

Si Emnace sa pakighinabi niini sa Banat News kagahapon mibutyag nga naglakaw siya sa south coastal road dihang miduol kaniya ang duha ug kalit migakos si Baguio dayon gitiunan siya niini og kutsilyo.

Sa kahadlok ni Emnace gihatag niya ang iyang cellphone ug ang suspetsado midagan dayon palayo, sa kahadlok mikaratel og dagan ang biktima ug nagpakitabang hinungdan sa pagkasikop sa usa sa mga estambay ug kabanay. (Brenda Batuto)

Enforcer sa Talisay gipusil talandugon

Kritikal ang kahimtang sa usa ka traffic enforcer sa dakbayan sa Talisay human giulo pagpusil sa wala mailhing lalaking nag-angkas og motorsiklo kagahapon sa hapon diha sa dalan, Sangi, Barangay Tabunok.

Ang biktima mao si Roel Capala, pag-umangkon ni city councilor Aaron Capala nga daling gidala ngadto sa Talisay City District Hospital apan tungod sa kahimtang niini gibalhin ngadto sa Chong Hua Hospital.

Si PO3 Mikie Espina uban kang PO2 Stephen Sefuesca nga miimbestigar sa hitabo mibutyag sa Banat News nga nag-inspeksyon si Capala sa mga enforcers ilawom sa flyover dihang duha ka lalaking sakay og motorsiklo ang kalit lang mitungha ug ang angkas niini mipusil kaniya.

Nagduda ang kapolisan nga posibleng may koneksyon sa trabaho ang motibo sa mga gikatahapan. – BANAT NEWS