Brgy. peacekeepers sa Lapu' gamiton vs. krimen

CEBU, Philippines - Nagmalampuson ang unang adlaw sa paglusad sa Barangay Peacekeeping Action Team (BPAT) nga gipasiugdahan sa Police Community Relations (PCR) sa Lapulapu City Police Office nga gisugdan sa milabay’ng Lunes.

Matud pa ni SPO1 Rodito Viovicente ang hepe sa PCR-LLCPO nga nahimo nilang pilot barangay ang Pajo dakbayan sa Lapulapu kansang tumong mao ang pagsulbad ug pagmenus sa krimen sa dakbayan sa Lapulapu.

Sumala pa niini matag residente sa barangay dunay dakong papel sa kahapsay ug kalinaw sa ilang mga lugar ug ang BPAT makatabang niini inabagan sa mga nagkadaiyang organisasyon, opisyal sa lokal nga kagamhanan ug sa kapolisan.

Ang Pajo maoy gihimong pilot area sa BPAT gumikan sa kasagarang panghitabo sa mga batan-on anaa sa maong barangay bunga sa panagribal sa mga fraternity ug gangs.

Gumikan niini ang mga residente ug mga nagkadaiyang organisasyon sa matag barangay kinahanglan aduna nay gahom sa pagsikop sa mga malapason sa balaod ug sila nay motugyan niini ngadto sa kapolisan.

Samtang hugtan na usab nila ang implementasyon sa Curfew Ordinance diin sa unang adlaw sa paglusad niini sa Brgy. Pajo pipila ka mga batan-on ug minor de edad ang gipapauli sa ilang mga panimalay atol sa pagpahigayon og inspection sa matag balay kahilayan sa maong barangay. - Bong Soriano (BANAT NEWS)