Tomas supak kaso ni Dumpit ibalhin sa Manila
CEBU, Philippines - Dakong supak si Mayor Tomas Osmeña nga ipabalhin ang kaso ni SPO1 Adonis Dumpit sa Manila kini tungod kay gihulagway niya kining susama na og gisilotan ang maong polis nga igo lang nagtrabaho sa iyang responsibilidad.
Matud pa ni Osmeña nga usa ka dakong desisyon kun ugaling ipatuman ilabi na sa parte sa pamilya ug abogado ni Dumpit nga mogasto gyud og dako aron lang makatambong sa hearing niini.
Dugang pa sa mayor nga kung ila man ugaling sundon ang maong tanyag maka-demoralized kini sa imahe sa kapolisan.
Kini iyang gibase sa gidaghanon sa mihatag og hinabang pinansyal nga mga polis alang kang Dumpit. Mokabat sa 340 gikan sa dul-an usa ka libong polis sa Cebu City Police Office ang mitunol og kwarta nga miabot sa kapin sa P21 mil.
Tungod sa maong taho si Osmeña mihangyo sa Regional State Prosecutors Office aron ma-reconsider ang maong plano sa pagpabalhin sa kaso ni Dumpit.
“That’s putting many burden on his part, I hope that they will hear my request,” pasabot pa ni Osmeña.
Tungod niini, nalakbitan sa mayor ang pagkumparar kang Dumpit sa kontrobersyal usab nga anak sa mayor sa Talisay nga si Joavan Fernandez ug kanhi supreme master sa Philippine Benevolent Missionaries Association Ruben Ecleo Jr. nga pulos anak sa mga impluwensyadong tawo.
“Nganong dili man anak ni Mayor Soc Fernandez ang ibutang sa Manila nga nagsalig mana siya nga anak siya og mayor? Nganong dili man si Ecleo ang ibutang sa Manila? It’s not fair on the part of Dumpit. I think it’s very demoralizing on the part of the policemen,” pasabot ni Osmeña.
Sumala pang Osmeña nga matag dunay mga dagkong alarma ipaon si Dumpit unya og karun nga nag-atubang na kini og kaso ibalhin na hinuon sa Manila. – BANAT NEWS
- Latest
- Trending
