LTFRB-7 director miharong sa mga operator og taxi

CEBU, Philippines - Si Land Transporation Franchising and Regulatory Board (LTFRB-7) regional director Romulo Bernardes nakigharong kagahapon sa buntag sa mga opisyal ug sakop sa Metro Cebu Taxi Operators Association (MCTOA) nga namasangil kaniyang nanguwarta sa mga prankisa sa mga taxi units sa Sugbo.

Si Bernardes nagkanayon nga wala siya motago sa isyu nga gireklamo sa mga taxi operators, pinangulohan sa presidente sa MCTOA nga si Richard Cabucos.

Subling gihimakak ni Bernardes nga iyang gibaligya og P120 mil ang prankisa sa taxi unit. Matud niya P10 mil ra ang bayad niini apan iyang gitataw nga wala na siyay mahimo pa kun ang gipangduol sa mga taxi operators mga fixers sa gawas sa iyang buhatan.

Giangkon hinuon ni Bernardes nga ang iyang buhatan maoy nagtumbok nga gi-abandonar ug na-expire na ang usa ka prankisa sa taxi, base sa database sa ilang buhatan.

Apan si Cabucos wala motuo kang Bernardes ug mikwestiyon sa pag-isyu og certification nga abonadonado na ang usa ka prankisa bisan og giproseso na ang renewal sa taxi unit sa iyang mga sakop apan gi-consolidate lamang kini sa pag-file aron usa ra ang filing fees niini.

Si Bernardes mitumbok nga dili mahimong balido ang pag-consolidate sa renewal sa prankisa kun wala kini pagpahilo sa iyang buhatan.

Samtang si Assistant Ombudsman Virginia Palanca-Santiago miawhag sa mga taxi operators nga mo-execute og affidavit ug mopasaka og kasong kriminal sa ilang buhatan batok kang Bernardes ilabi na sa mga nakabayad sa gipangayong P120 mil.

Kini aron makatubag dayon si Bernardes sa maong kaso ug mapahamtangan og silot kun may igong ebidensiya. – BANAT NEWS