Lolo misandig sa poste nakuryentihan patay

CEBU, Philippines - Nakuryentihan patay ang usa ka 77 anyos nga lolo dihang nakasandig siya sa posting puthaw sa kuryente (nga nalatayan og kuryente) didto sa Sitio Kalimang, barangay Poblacion ,lungsod sa Boljoon niadtong Martes sa sa buntag.

Ang biktima mao si Florentino Mendez Fegarido, 77, biyudo, nga taga Kalimang.

Si PO3 Reynaldo Rollon sa Boljoon Police Station mibutyag sa Banat News nga gikan nga nanglawog ang biktima sa iyang mga binuhi nga baboy niadtong higayona ug paingon na unta kining mopauli sa ilang balay.

Apan pag-abot niya sa posting puthaw sa kuryente, mipahuway siya ug misandig niini dihang kalit siyang nakuryentihan nga maoy hinungdan sa hinanali niyang kamatayon.

Ang iyang silingan nga si Jovito Villareal, hingkod, miingon nga gisuwayan niya og tabang ang biktima, apan nakuryentihan usab siya hinungdan nga miatras siya ug mipalayo sa maong lugar ug nangayo og panabang sa ilang mga silingan.

Human putla sa Cebeco ang linya sa kuryente sa maong lugar, gisakwat nga wala nay panimuot ang biktima sa iyang mga silingan ug gihatod ngadto sa Alcantara District Hospital sa lungsod apan gideklarar nga dead on arrival.

Apan ang kabanay sa biktima nangandam na nga mosang-at og kaso batok sa mga opisyal sa barangay nga gipangulohan ni board member Daday Celis, ang kapitan sa barangay tungod kay usa ka barangay project ang maong poste sa kuryente.Gibutyag ni Felixberta “Inday” Fegarido, pag-umangkon sa biktima dihang nahinabi sa Banat News sa telepono nga ila nang gikomprontasi ang tagdumala sa CEBECCO-2 sa maong hitabo, apan mitumbok kini sa barangay nga maoy may dakong tulobagon tungod kay ila kining proyekto ug ang mga barangay electrician niini ang nag-estalar sa maong mga poste.

Samtang usa ka Manny Derama mibutyag usab sa Banat News nga ikaduha na kining hitabo nga may nakuryentihan patay sa maong mga poste sa suga sa barangay.

Matud pa niya nga usa ka 10 anyos nga si Joan Maano, taga Sitio Talisay , barangay Poblacion, Boljoon , namatay usab sa miaging tuig dihang nakahikap sa usa sa maong mga poste. Apan matud ni Derama igo lang gihatagan ang mga ginikanan sa bata og P4 mil isip   financial assistance gikan sa barangay.

Hinuon matud ni PO3 Rollon nga padayon pa ang ilang imbistigasyon karon sa pagtumbok kun si kinsa ang angay manubag sa maong panghitabo. – BANAT NEWS