CEBU, Philippines - Babayeng napalgang nabulit og samad dinunggaban ug patay na diha sa Camp 3 sa dakbayan sa Talisay niadtong milabay’ng Domingo sa buntag wala pa gihapon mailhi.
Apan usa ka wala magpailang babayeng giingong taga dakbayan sa Toledo nga mibisita sa punerarya sa Saint Francis sa N. Bacalso Ave. dakbayan sa Sugbu ang giingong miila niini niadtong Domingo dayon sa hapon.
Matud pa ni PO3 Mikie Espina sa Talisay City Police Station sa Banat News, ang maong babaye nagminatay na og hilak ug nagpunay og sampit sa pangalang “Irish anak” ug giingong kaparehas og nawong sa gidala niining picture sa babaye ang gipatay.
Apan sa dihang ipadayon na ang awtopsiya ug giwahing-wahing ang patay’ng lawas kalit nga nausab ang tonada sa maong ginang ug kini mipahibalo sa mga tawo sa punerarya nga dili diay kini mao ang iyang anak ug nananghid nga mobalik lang kini. Ang maong babaye mibutyag nga wala na makauli ang iyang anak gikan nag-field trip apan wala kini mobutyag kun kanus-a kini mahitabo.
Si Espina nagkanayon nga ang patay’ng lawas dili ma-autopsy kung walay tagtungod nga mohatag og pagtugot niini, duna usab kini mga dokumentong pirmahan ug mga balayrunon.
Sa laing bahin, si Espina nagkanayon nga gipaladman pa nila ang imbestigasyon sa insidente ug ilahang gituohan nga dili lang usa ka tawo ang mipatay sa biktima. – BANAT NEWS