Koreano nag-unang turista

CEBU, Philippines - Nagpabiling nag-una sa gidaghanon ang mga Koryanong turista dinhi sa Sugbu sa tuig 2009, gisundan sa mga Pilipino nga balikbayan ug ikatulo ang mga Hapon. Mao kini gibutyag ni Alien Control Officer Casemiro Madarang III sa Bureau of Immigration (BI) 7 sa pakighinabi sa Banat News kagahapon kinsa nagkanayon nga ang mga Koreano maoy nag-una sa "Top 10 nationalities arrival of 2009" dinhi sa Sugbu.

Base sa record ang mga Koreano mikabat sa 154,370, gisundan sa mga balikbayang Pilipino nga may 106,390, samtang ang mga Hapon mikabat usab 55,113.

Ang China 35,001, USA 27,010. Germany 10,697. Great Britain 10,429. Australia 9,015. Taiwan 7,087 ug Singapore 5,880. Matud pa ni Madarang nga bisan may mga kagubot sa Mindanao apan wala kini hatagi og pagtagad sa mga turistang langyaw.

 Ang kamalinawon dinhi sa lalawigan sa Sugbo maoy naghatag og bintaha hinungdan nga midagsang dinhi ang mga turista. Usa usab sa nakalingaw kaayo sa mga turista dinhi mao ang mga piniriso sa Cebu Provincial Detention and Rehabilitation Center (CPDRC) nga ila gyung silingon sa personal nga kahimtang niini human nila masud-ong ang makalingaw nga sayaw niini sa You Tube.Gumikan niini gihangyo ni Madarang ang mga otoridad sa kapolisan sa pagmintinar kanunay sa kalinaw ug kahusay sa lalawigan sa Sugbo aron modagsang ang mga turista nga makatabang kaayo sa pagpalambo sa ekonomiya dinhi sa lalawigan. – BANAT NEWS