Lapulapu di ma-Comelec control

CEBU, Philippines - Hanap pa ang katumanan sa tinguha sa pipila ka pundok politikanhon sa dakbayan sa Lapulapu nga mapaubos ang maong dakbayan sa Comelec Control karong   election sa Mayo, sumala ni Election Supervisor Ferdinand Gujilde kagahapon.

Kini tungod kay matud pa ni Gujilde nga ang mga krimen nga nahitabo sa dakbayan sa nangaging mga adlaw dili mahimong basehanan aron ipaubos sa Comelec control ang nahisgotang dakbayan.

Gitataw ni Gujilde nga base sa imbestigasyon sa kapolisan, nasuta nga ang mga krimen nga nahitabo sa dakbayan kasagaran naglambigit sa personal nga panagbangi nga walay labot sa politika.

Matud pa ni Gujilde nga daghan ang mga hinungdan aron ikapaubos ang usa ka lugar sa Comelec control.

Usa niini mao ang presensya sa mga private army nga iya sa mga politiko nga maghatag og hulga sa dakong kagubot panahon sa election

Apan sa bahin sa Lapulapu si Gujilde miingon nga wala sila'y namatikdan nga may private army ang mga politiko sa maong lugar busa walay katarungan nga ibutang kini ubos sa Comelec control. – BANAT NEWS