Jingjing Osmeña mitaliwan na
CEBU, Philippines - Si kanhi konsehal Rogelio “Jingjing” Osmeña sa dakbayan sa Sugbo mitaliwan na sa laing kalibotan didto sa Perpetual Soccour Hospital kagahapon sa ala l:00 ang takna sa kaadlawon, sa edad nga 69.
Gawas sa iyang pagka-konsehal, si Jingjing nga ig-agaw ni Mayor Tomas Osmeña nahimo usab nga regional director sa Land Transportation Franchising and Regulatory Board-(LTFRB)7.
Nahimo usab siyang chairman sa City Traffic Operations Management (CITOM) sa tuig 1993-1995.
Si Osmeña nagserbisyo isip konsehal sa syudad sa Sugbo sulod sa duha ka termino.
Nasayran nga daan nang masakiton si Osmeña sa kidney ug gani sa milabay'ng upat ka tuig mipaubos kini sa kidney transplant.
Apan karong tuiga nasayran nga migrabi na pag-ayo ang iyang balatian.
Sa bahin ni Mayor Osmeña, gipadayag niya ang dako niyang kasubo sa pagtaliwan sa iyang ig-agaw kinsa nagbilin og dili makalimtan nga gimbuhaton ,sama sa higpit nga pagpasul-ob og helmet sa mga magsakay og motorsiklo, pagbansay sa kapolisan, ug uban pa. – BANAT NEWS
- Latest
- Trending
