Batan-on gikulata, gipusil tipi

CEBU, Philippines - Patay ang usa ka batan-ong gikulata ug gipusil sa tulo ka wala mailhing batan-on pasado alas 10 sa miaging gabii sa sitio Tagunol barangay Basak Pardo.

Ang namatay nailhan nga si Raymond Perocillo Ramirez, 18, taga sitio Tabaska barangay San Nicolas.

Matud pa sa nakasaksi ngadto sa kapolisan nga nasigpatan niya ang biktima nga gigukod sa tulo ka batan-on gikan sa sitio All Seasons ug dihang naabtan usa sa mga batan-on ang misumbag niini makadaghang higayon.

Apan ang usa sa mga batan-on gikatahong adunay dalang armas ug mipusil sa biktima   tulo ka higayon, bisan paman og samdan nakaikyas gihapon kini apan 30 metros gikan sa nahitaboan nalup-og si Ramirez.

Ang biktima may samad pinusilan sa dughan ug gidala sa Cebu City Medical Center apan pipila ka oras ang milabay namatay ra usab kini.

Matud pa sa testigo yano kaayong milakaw ang mga mamumuno balik sa sitio All Seasons ug padayon pa karong gipangita sa kapolisan.

Sa laing bahin usa ka menor de edad nga giingong miyembro sa gang ang nasamdan human gipusil sa miyembro sa karibal nga gang sa miaging gabii sa sitio Lower Gun Club barangay Guadalupe.

Si Aloy (ngalan gipugngan) 16, molupyo sa nahisgutang lugar ug giingong sakop sa Bloods gang gipusil sa usa ka ginganlan og ‘Jekie’ nga giingong sakop usab sa Crips gang samtang kini naglingkod daplin sa dalan.

Gikatahong milabay niadtong tungura ang suspek ug pipila ka metros gikan sa iyang gilingkuran mihunong kini ug mipusil kaniya tulo ka higayon hinungdan sa pagkaangol niini sa batiis. - Lesley Caminade (BANAT NEWS)