Polis Naunhan sa pusher

CEBU, Philippines - Usa ka gipasanginlang level 2 drug pusher ang nakaeskapo human maunhi og tion og armas ang polis nga modakop unta kaniya atol sa pagsiksik sa iyang balay pinasikad sa search warrant diha sa San Antonio, barangay Jagobiao dakbayan sa Mandaue sa milabay’ng hapon.

Ang nakaeskapo mao si Stephen “Toyet” Canonigo , residente sa maong dapit nga giingong dugay nang namaligya og shabu sa maong lugar.

Matud pa ni Sr .Supt. Noel Gillamac Director sa Mandaue City Police Office nag-serve sa search warrant sila si Insp. Reymundo Rodriguez sa City Anti-Illegal Drugs Special Operations Task Force tungod sa impormasyong namaligya kini og shabu. Sila si PO2 Jefferson Jacalan ug PO3 Cirilo Luague nga maoy misulod unta sa balay apan naunhan og tion sa kalibre .38 nga armas ni Canonigo.

Walay nahimo ang duha ka polis hinungdan nga nakahigayon sa pagsibat ang suspetsado. Bisan paman niini, gipadayon sa mga polis ang pagsiksik sa balay ug nakuha ang siyam ka mga medium size nga paketeng may sulod nga gituohang shabu nga gibanabanang mokabat sa P500 matag usa ug duha ka mga buhing bala sa kalibre .38.

Matud pa ni Insp. Rodriguez si Canonigo usa ka level 2 drug pusher ug gikan sa Mindanao ang iyang suplay sa shabu. Human nila makumpirmar ang operasyon niini mikuha sila og search warrant sa Mandaue RTC Branch 55 pinaagi ni Hon. Judge Ulrich Cañete. - Bong Soriano (BANAT NEWS)