Liog sa tanod gisanggot

CEBU, Philippines - Diriyot mapunggot sa hingpit ang liog sa usa ka barangay tanod human kini gisanggot sa iyang silingang tiguwang gumikan sa pagdudang gidisdisan sa biktima ang pukot panagatan niini.

Ang linuog nga krimen nahitabo diha sa baybayon sa Manguto sa lungsod sa Pinamungahan kagahapon pasado alas -10 sa buntag samtang ang biktimang si Gildo Laob, 29, nagkaon kauban ang mga higalang mananagat.

Samtang ang suspek nga naabtan sa kapolisan diha sa dalan samtang nagpaabot og kasakyan sa pag-ikyas giilang si Ricardo Cañales, 68, usa ka mananagat ug silingan ra sa biktima.

Si PO2 Wadden Teologo sa Pinamungahan police station sa pakighinabi sa Banat News miingon nga suod nga managhigala ug silingan ang biktima ug suspek apan base sa mga impormasyong ilang nakuha sa barangay hall ‘maldito’ ang suspek.

Sumala pang Teologo, kasamtangang nagkaon ang biktima nga usa usab ka mananagat kauban ang ubang mananagat sa usa sa mga payag dihang miabot ang suspek gikan sa luyo.

Matud pa niini nga kalit nga miduol sa luyo sa biktima si Cañales niadtong tungura ug may gibitbit nga sanggot ug walay daghang pahimangno mibira sa buhok ni Laob padulong sa luyo.

Dihang nahangad ang ulo ni Laob kalit nga gisanggot sa suspek ang ubol-ubol niini, matud pang Teologo, gumikan sa kahait sa sanggot nagkawil-kawil nalang ang ulo ni Laob gikan sa lawas ug nakabsan kini dayon sa kinabuhi.

Ang mga kauban ni Laob nga nangaon nagkatibulaag og panagan ug nangayo sa tabang sa mga polis. Si Teologo uban sa grupo ni PO3 Peter Cuancho miresponde sa dapit ug nasugatan ang suspek diha sa daplin sa dalan nga nagbitbit pa sa maong sanggot.

Sa pag-imbestigar kang Cañales diha sa presinto kini mibutyag nga nagduda siyang si Laob maoy midisdis sa iyang gitaktak nga pukot pipila na ka adlaw ang nakalabay.

Matud pa ni Cañales base sa imbestigasyon diha sa dapit daghan na ang nangreklamo batok sa suspek tungod sa pagka-maldituhon niini ilabi na kun maunhan sa dapit nga taktakan niini og pukot sanglit kun duna kini makit-ang gibiling pukot sa lawod iyaha kining disdisan (buslotan).

“Kini sang tiguwanga (suspek) maldito daw ni kun manaktak og pukot kay iyahang disdisan ang pukot sa uban, nagduda lagi daw siya nga gibawsan siya ug kining biktima maoy iyang gidudahan,” matud pang Teologo.

Ang suspek gikatahong kaniadto pa mibahad nga iyang patyon ang bisan kinsang mahibaw-an niyang modisdis sa iyang pukot. Kasong murder maoy gikatakdang ipasaka batok kang Cañales karong adlawa. - Edwin Ian Melecio (BANAT NEWS)