Teacher pabalayon

CEBU, Philippines - Gihangop ni Department of Education (Dep-Ed)-7 director Recaredo Borgonia ang panawagan ni Education secretary Jesli Lapus ngadto sa mga local government units nga tabangan ang mga magtutudlo nga makapanag-iya og kaugalingon nilang yuta ug panimalay.

Matud pa ni Borgonia nga dako kaayo og ikatabang ang mga LGU's aron makaangkon og kaugalingong panimalay ang mga kabus nga magtutudlo dinhi sa Central Visayas lakip na ang Sugbu ug ubang lugar sa Pilipinas.

Sayo niini, gihangyo ni Secretary Lapus ang mga LGU's nga tabangan ang mga magtutudlo nga makaangkon og luna ug panimalay sanglit kadaghanan sa mga magtutudlo karun wala pay kaugalingong panimalay.

Giluwatan ni Lapus ang maong hangyo atol sa pinirmahay sa usa ka kasabotan tali sa Department of Education sa mga opisyal sa siyudad sa Bogo alang sa paghatag og yuta ingon man panimalay sa 106 ka magtutudlo ug sa mga DepEd non-teaching personnel sa maong lugar.

Nanghinaot si Borgonia nga mosanong usab ang ubang mga LGU's sa hangyo ni Lapus aron ang mga magtutudlo makaphimulos ning maong programa.    (BANATNEWS)