Ronald Cuenco misang-at og mosyon bahin sa disqualification

CEBU, Philippines - Mipadala na og motion for reconsideration ang abogado ni Ronald Cuenco ngadto sa Commission on Elections sa Manila aron i-reconsider ang nahauna niining desisyon nga nag-diskwalipika kaniya nga makalansar pagka-konsehal sa dakbayan.

Sa pito ka pahinang mosyon, si City Councilor Edgardo Abella nga maoy abogado ni Cuenco mipasabot sa Comelec nga giabandonar na sa iyang kliyente ang “permanent resident status” niini sa Estados Unidos niadto pang Nobiyembre 24 maong dili kini mahimong pugngan nga magpapili sa dakbayan.

Lakip sa gipasa ni Labella sa maong mosyon ang kamatuuran niini nga kopya sa Comelec certification nga nagpakitang si Cuenco rehistrado nang botante sa Precinct 1370-B sa barangay Guadalupe ug may Voters Identification nga 2217-1370B-G0564RRCI0000-5.

Usa sa mga mokandidato sa pagka-konsehal sa dakbayan nga si Rajeni Dy kinsa maoy mipasaka og disqualification case batok sa anak ni South district Kongresista Antonio Cuenco, miingon nga wala makaabot og usa ka tuig ang pagpuyo ni Ronald dinhi sa Sugbu human niini permanenteng giputol ang residensya sa US.

Si Labella midepensa sa iyang kliyente nga dunay mga dokumentong makapamatuod nga si Cuenco mibalik na og puyo dinhi sa Pilipinas ug kun kwentahon gikan sa umaabot nga Mayo 10, 2010 elections mokapin na kini usa ka tuig.

Hinuon sumala pa sa abogado nga bisan paman giangkon ni Cuenco ang iyang status sa US apan di ikalimod nga mas dugay siyang nagpuyo dinhi sa Pilipinas base usab sa record sa departures ug arrivals sa pasaporte niini.

Human makadesider nga mokandidato sa dakbayan ilawom sa Bando Osmeña Pundok Kauswagan (BOPK) mi-apply dayon kini sa US Consulate nga nag-abandonar sa iyang green card tungod kay base sa balaod dili kwalipikado kadtong mga mokandidatong may permanent residency o ba kaha imigrante ngadto sa ubang nasud.   (Edwin Ian Melecio ug Rene Boromeo sa The Freeman)   (BANATNEWS)