Comelec di kabadlong

CEBU, Philippines - Giangkon sa Commission on Elections (Comelec) nga wala gyud sila'y mahimo pagbadlong niadtong mga lokal nga kandidatong nagsugod na og pamilit og campaign posters bisan og unya pa sa bulan sa Marso magsugod ang kampanya sa local positions.

Matud ni Cebu City Election Officer for the North district Marchell Sarno nga walay kalapasan nga nahimo ang tanang lokal nga kandidato tungod kay bugtong ang mga kandidato ra sa nasudnong posisyon ang gi-regulate pagsugod sa campaign period karung adlawa.

Nasayran nga duna nay pipila ka mga campaign posters ang gipamutang sa lain-laing dapit sa dakbayan sama nila ni Konsehal Jun Pe, Konsehal Edgardo Labella ug mga kandidato sa pagkakonsehal nga si Noel Wenceslao sa Bando Osmeña Pundok Kauswagan.

Giklaro ni Sarno unya pa sa petsa 26 sa Marso magsugod sa campaign period nga mahimong ma-regulate ang mga campaign posters sa mga kandidato sa lokal nga posisyon.

Gipasidan-an hinuon ni Sarno ang mga political coordinators sa nasudnong kandidato nga mosunod sa lagda ug dili magpataka og pamilit sa mga posters sa ilang mga kandidato nunot sa pagsugod na sa campaign period karung adlawa. (BANATNEWS)