Mag-uuma gipusil namatay

CEBU, Philippines - Usa ka mag-uuma nakabsan sa kinabuhi human kini pusila sa wala hiilhing kriminal didto sa barangay Togonon, dakbayan sa Danao, kagahapon sa buntag.

Si SPO1 Jose Salingua sa kapolisan sa dakbayan sa Danao miila sa biktima nga mao si Antonio Durano Jr., mag-uuma sa maong dapit.

Matud pa ni SPO1 Salingua nga wala hiilhi ang mamumuno kay wala'y nakasaksi dihang gipatay kini.

Miingon siya nga nadawat nila ang taho kagahapon sa buntag dihang ang mga silingan na sa biktima maoy nakamatikod niining patay na nga nagbuy-od sa daplin sa dalan sa ilang lugar kansang lawas nabulit sa mga pinusilan.

Hinuon niadtong Sabado sa gabii may gipahigayong disko sa duol sa pinuy-anan sa biktima, apan malinawon kaayo ang maong kalingawan sumala pa ni Salingua.

Sa pagkakaron padayon pa nilang gisusi ang maong hitabo aron masayran kun may kontra ba ang biktima o kaha gipareglahan lang.

Sutaon usab sa kapolisan kun si kinsa ang mipatay sa biktima. – BANAT NEWS