CEBU, Philippines - Nadakpan kagahapon sa kapolisan ang usa ka suspetsadong karnaper og motorsiklo human kini positibong gitudlo sa iyang mga nabiktima didto sa sitio Mananga II, barangay Tabunok, dakbayan sa Talisay.
Nagtingkagol na karon sa prisohan sa Talisay City si Gary Conopio, hingkod nga taga Mananga II, human kini masikop nila ni PO3 Mikie Espina, PO3 Arnold Damasco ug PO2 Stephen Sefuesca.
Ang mga biktima ni Conopio mao sila si Erwin Lapera, 26, taga Hollow Block Subdivision, barangay Lagtang ug Jarie Parba, 19, nga taga sitio Mananga II, Tabunok, tanan sa dakbayan sa Talisay.
Si PO3 Espina nga nahinabi sa Banat News kagahapon mibutyag nga sa mga alas 4:00 sa kadlawon kagahapon ang XRM nga motorsiklo ni Lapera nga nagtangag sa plakang GO-3843 nga kolor pula, giparada niini diha sa iyang tugkaran.
Apan kalit lang nga misinggit ang iyang mga silingan nga mipahibalo nga gikawat ang iyang motorsiklo.
Matud ni PO3 Espina nga giguba ni Conopio ang lock sa motor ug giputol ang wire niini ug gipa-spark ang duha ka wire hinungdan nga nakaandar ang maong sakyanan.
Si Lapera dihang nakabati sa singgit sa iyang mga silingan daling migawas sa ilang balay ug maoy nakit-an niini si Conopio mga 100 metros na ang gilay-on gikan sa iyang balay nga nagguyod sa motor hinungdan nga iyaha kining gigukod.
Apan pagkakita ni Conopio kaniya, misutoy kini og dagan ug gibuhian ang motorsiklo.
Dihadiha misumbong dayon ni Lapera ngadto sa kapolisan ug gitabangan nila og pangita ang suspetsado ug didto kini nila hisakpi sa Mananga II.
Si PO3 Espina mibutyag usab nga si Parba misumbong usab kanila nga gikawat gihapon ni Conopio ang iyang Honda nga motorsiklo nga may plakang GK-8886 kolor puti kagahapon sa alas 5:00 sa buntag didto sa iyang tugkaran.
Hinuon mitug-an ang suspek ngadto sa mga polis nga ang motorsiklo ni Parba iyang gidala ngadto sa sitio Magay, barangay Tanke.
Giadto dayon sa mga polis ang maong lugar ug didto nakita tinuod niini ang motorsiklo sa biktima nga giparking sa daplin sa karsada atbang sa usa ka balay kansang tag-iya wala nila hiilhi. Si Conopio nagdumili sa pagtug-an kung kinsay iyang gibinlan sa motorsiklo ni Parba didto sa Tanke. – BANAT NEWS