Polis gireklamong nanion og armas

CEBU, Philippines - Usa ka polis nga nadestino sa Madredijos Police station sa lungsod sa Madredijos sa Bantayan ang gipasanginlang nanion sa iyang armas ngadto sa mga estambay nga nag-inom sa barangay Taytayan siyudad sa Bogo niadtong Biyernes sa alas 8:00 sa gabii.

Ang biktima nga mireklamo mao si Benigno Mangubat Cuambot, 39, taga barangay Taytayan, samtang ang gipasanginlan niining nanion niya og armas mao si SPO1 Manolo Jo nagpuyo usab sa maong lugar apan nadestino sa Madredijos police.

Matud ni PO3 Rolando Torquido sa Bogo City Police, nadestino sa Madredijos Police si SPO1 Jo apan lumad kini nga molupyo sa maong lugar.

Subay sa pasangil sa biktima dihang gisukit-sukit sa kapulisan nga samtang siya uban ang iyang mga higala nalingaw sa pag-inom niadtong tungura kalit lang miduol si SPO1 Jo ug sa wala'y igong hinungdan gitionan niini sa armas nga wala niya matino ang kalibre.

Matud niya nga ang maong panghitabo nakahatag gyud og tumang kahadlok kaniya ug kabalaka dihang gitionan siya sa armas.

Apan gipadayag ni SPO1 Jo dihang nahinabi sa Banat News kusganong mihimakak sa alegasyon ug pulos bakak ang mga pasangil ni Cuambot ug gibutyag niining igo lang siyang niadto sa dapit human makadawat og tawag gikan sa iyang manghod nga si Oliver Jo nga giatangan sa reklamante ug mga barkada niini diha dapit sa buwangan sa Bogo.

Matud pa ni SPO1 Jo pag-abot niya sa lugar gipapauli niya ang iyang manghod tungod kay hubog ug dihang nakakita niya ang biktima nga nag-inom niadtong higayuna nahadlok kini ug midagan pahilayo apan wala gyud mahitabo nga nanion siya og armas tungod kay wala siya magdala sa iyang isyu nga armas niadtong tungura tungod kay off-duty siya ug tungod sa gun ban.

Gidugang ni SPO1 Jo nga ang biktima iyaha untang pasakaan og kaso tungod kay gidunggab niini ang iyang manghod niadtong unang semana sa Enero apan wala makaigo tungod sa kahubog ug tungod sa hangyo sa mga kabanay niining iyang kaila wala niya ipadayon ang pagpasaka sa kaso.

Misumbalik hinuon og pasangil si SPO1 Jo nga naila na ang reklamante ug mga barkada niini sa maong lugar nga kanunay'ng mamaregla ug gani gi-ban na kini sulod sa buwangan human namaregla og ‘puntos’ sa buwangan sa mga milabay'ng bulan. – BANAT NEWS