CEBU, Philippines - Usa ka gidudahang tulisan ang gikonbikto sa Regional Trial Court ug mipabilanggo niini sulod sa 15 ka tuig human mapamatud-ang sad-an sa kasong possession of illegal drugs human makuhai og usa ka paketeng shabu diha sa iyang brief.
Si Nilo Orbiso Santir nga taga barangay Taboan ang nasikop sa kapolisan niadtong Pebrero 18, 2009 human kini nabantayan nga adunay dalang kutsilyo sa iyang hawak.
Matud pa ni PO1 Arnel Gabucan nga mi-testimonya nga niadtong Pebrero 18, 2009 sa diha nga nagpahigayon sila og ‘roving patrol’ sa Taboan Public Market iyang nabantayan si Santir nga may gitaking kutsilyo sa hawak.
Apan nabantayan ni Santir si Gabucan ug daling milakaw hinungdan nga nanawag og backup si Gabucan ug naabtan dihang nadasmag sa mga banyera sa isda.
Dihang gipangutana nganong duna kini gisukbit nga kutsilyo nagdumili kini sa pagtubag hinungdan nga ilaha kining girekisa ug diha nakuhaan og usa ka paketeng shabu diha sa brief niini. Wala hatagi og gibug-aton sa korte ang pangangkon ni Santir nga diha ra siya sa gawas nga bahin sa baligyaanan og buwad niadtong tungura apan kalit siyang giduol og upat ka tawo ug nagkanayon nga adunay snatching incident sa maong lugar ug kalit lang siyang gi-aresto. – BANAT NEWS