Direktor gipasanginlang 'nangwarta'

CEBU, Philippines - Gipasanginlan sa mga opisyales ug mga miyembro sa Cebu Taxi Operators Association kon CTOA nga ‘nangwarta’ ang regional director sa Land Transportation Franchising and Regulatory Board kon LTFRB nga si Romulo Bernaldez sa pagpuno og dugang nga taxi units dinhi sa Sugbu.

Ang alegasyon gikan sa presidente sa CTOA nga si Richard Cabucos nga miingong dili na nila maantos ang gihimo ni Bernaldez sa paghatag niini og pagtugot nga mapun-an og dugang taxi units ang Sugbu bisan og may moratorium nga giisyu niadtong tuig 2000 tungod sa kadaghan na sa mga taxi dinhi.

Matud pa ni Cabucos nga ang iyang mga miyembro mireklamo tungod kay si Bernaldez na mismo ang namaligya sa maong prangkisa sa kantidad nga P120 mil, giingong ang prangkisa sa usa ka taxi unit nagkantidad lamang og P10 mil.

Si Cabucos mitumbok nga gihimong basehanan sa pagbaligya og prangkisa ni Bernaldez mao ang Memorandum Circular 035 nga nagtugot nga may makaisyu og prangkisa sa unit sa taxi dinhi sa Sugbu base sa na-expired na ug giabandonar na nga prangkisa.

Apan gitataw niining ang mahatagan lamang sa maong prangkisa mao ra kadtong mga operators nga gipaboran ni Bernardez. 

Dugang pa ni Cabucos nga sa wala pa molingkod si Bernardez 5 mil lang ka units ang nagdagang taxi dinhi sa Sugbu apan sa duha ka tuig nga paglingkod niini miabot na kini og kapin sa 6 mil.

Sa iyang bahin, kusganong gihimakak ni Bernaldez ang mga pasangil ni Cabucos.

“Wala gyu’y bisan usa ka taxi unit nga nadugang dinhi sa Sugbu until niabot ang Memorandum Circular 035 nga nag-appropriate og 200 units only for abandoned and expired nga prangkisa,” matud pa niini.

Sumala pa ni Bernaldez sa interview sa DyRF nga dili tinuod nga 5 mil lang ka units ang nagdagan sa Sugbu sa iyang paglingkod kundili 6,079 ka mga units.

Iya usab nga gipasabot nga dili sila mohatag og pabor ngadto sa may kwarta nga buot nga mokuha og prangkisa kay abli kini bisan sa mga miyembro sa CTOA.

Gitataw usab niining P10 mil lamang ang balayrunon sa prangkisa ug wala siya kahinumdum nga may gipangayoan siya og P120 mil nga bayad sa usa ka prangkisa sa taxi, sumala pa sa direktor wala siya’y gipangayuan ni bisan usa ka sentimos.

Gihagit ni Bernaldez ang miakusar kaniya sa pag-execute og affidavit ug mopasaka og kaso batok kaniya aron maklaro ang tanan. (Chester Abadilla)   (BANATNEWS)