Lacson dakponon

CEBU, Philippines - Mipakanaog na og mando ang korte sa Manila kagahapon sa pagpadakop kang Senador Panfilo Lacson kinsa nakalupad na ngadto sa gawas sa nasud niadtong Enero 5, duha ka adlaw sa wala pa siya pasakai og pormal nga sumbong sa korte kalabot sa kamatayon ni publicist Salvador “Bubby” Dacer ug sa iyang drayber nga si Emmanuel Corbito.

Ang report sa GMA News, kini nagkanayon nga ang arrest warrant   giluwatan ni Judge Myra Garcia Fernandez sa Manila Regional Trial Court Branch 18, kinsa maoy nagkupot sa double murder case batok kang Lacson.

Ang senador nga oposisyon milarga paingon sa Hongkong sa miaging buwan sa kabalaka nga hasion siya sa gobyerno gumikan sa kasong iyang giatubang. Wala pa usab masuta kun anaa ba siya sa Hongkong o kaha tua na sa laing nasud.

Hinuon ang National Bureau of Investigation nanghimakak sa taho nga si Lacson tua sa Australia.

Si Justice Secretary Agnes Devanadera namahayag kagahapon   nga wala gayud siya makadawat og kasayoran bahin kang Lacson kun asa na siya karon. Apan mibahad siya nga bisan unsang orasa nga motunob si Lacson pagbalik nganhi sa nasud dihadiha dakpon siya tungod kay giisip na siyang usa ka “fugitive” kon gipangita sa balaod.   (Wen Celen)    (BANATNEWS)