Taxi driver gipatay sa 16-anyos

CEBU, Philippines - Patay dihadiha ang usa ka taxi driver human kini gikatahong giliog pagdunggab sa usa ka minor de edad uban sa kuyog niining batan-ong lalaki. Nagduda ang kapolisan nga gitulis ang drayber sa wala pa patya.

Nahitabo kini sa Wright Brothers sa eskina Fulton, barangay Apas, pasado alas 11 sa miaging gabii.

Si Roel Aguilo Sagot, 38, drayber sa Chrisstoff Taxi nga nagtangag og plakang GXG 770, gidunggab sa 16-anyos nga si Art (tinuod nga ngalan gipugngan), second year high school sa pribadong tunghaan ug molupyo sa sitio Tribunal, barangay Centro, siyudad sa Mandaue.

Si Art nadakpan kauban ang usa ka Julian Ken Salabao Paca, 18, nga first year sa kursong Information Technology sa usa sa mga tunghaan sa siyudad ug molupyo sa dalan Panis, barangay Kasambagan.

Si Paca nga nahinabi sa Banat News misaysay nga sa wala pa mahitabo ang insidente, si Salonga nanghagad kaniya nga moadto sa panimalay sa ginganlan og Alfonso Martinez aron mag-inom.

Apan sa dihang nahiagi sila sa tungod sa panimalay ni Martinez, si Paca misulti kang Salonga nga “ang balay man to ni Alfonso, nganong milahos man ta.” Apan si Salonga mirason nga aduna pa sila’y hapiton nga iyang amigo nga nahimutang usab sa maong lugar.

Sa dihang naabot na sila sa maong lugar, nagpapaabot si Salonga kaniya ug sa drayber kay iya pang sanungon ang iyang higala kun mouban ba kanila og inom. Apan pipila ka gutlo ang milabay, mao nalay mitagbo sa mata ni Paca ang kutsilyo nga gigunitan ni Salonga.

Dugang pa ni Paca nga pagkakita niya sa kutsilyo, mao usab ang pagduslak niini ngadto sa drayber tumong sa liog ug gani iya pang nadungog nga miping-it ang drayber sa kasakit sa pagduslak ug mipasilbato pa kini.

Tungod sa iyang kahadlok, dali nga mikaratil og dagan palayo sa maong dapit si Paca apan nasikop ra usab kini human sa gipahigayon nga hot pursuit operation sa kapolisan.

Gihulagway usab ni Paca nga siya naglingkod sa likod nga bahin sa taxi samtang si Salonga naglingkod tupad sa drayber.

Matud ni Paca nga niadtong miaging semana si Salonga nagsige og reklamo kabahin sa bayranan sa tunghaan tungod kay ang amahan niini gikatahong wala na magpadala og kuwarta.

Samtang si Salonga nga nakaangkon usab og samad dinunggaban nasigpatan sa taga Mobile Patrol Group (MPG) 50 metros ang gilay-on gikan sa crime scene hinungdan nga ila kining gisignit ug gidala sa Cebu City Medical Center.

Sa pagresponde sa kapolisan, ilang naabtan ang biktima nga wala nay kinabuhi nga naghukdong sa manobela sa iyang gimaneho nga taxi diin nakuha gikan sa iyang pitaka ang kantidad nga P2,100 nga gituohang kita sa iyang pagpamasahero.

Samtang nakuha usab sulod sa taxi ang duha ka kutsilyo ug duha ka cellphone diin ang usa niini gipanag-iya ni Salonga.

Sa pakighinabi sa Banat News ni SPO3 Rey Cuyos, kini nagkanayon nga nakig-alayon sila sa Theft and Robbery Section aron pagtino kun natulis ba gyud ang drayber nga si Sagot human mideklarar ang asawa niini nga adunay pitaka ang iyang bana apan wala makit-i sa kapolisan.

Matud pa ni Cuyos nga adunay posibilidad nga misukol ang biktima human nakaangkon og samad dinunggaban si Salonga.

Si SPO3 Cuyos miingon nga posibleng Robbery with Homicide ang ipasaka sa duha ka suspetsado kun mapamatud-an nga gikuha ang pitaka ni Sagot.

Kasamtangan karun nga nagtingkagol sa karsel si Paca sa Cebu City Police Office, samtang si Salonga kasamtangan pa usab kini nga nagpaalim sa iyang samad. (Lesley Caminade)   (BANATNEWS)