37-anyos dalaga nakuhaag daghang marijuana

CEBU, Philippines - Nagtingkagol sa Talisay City detention cell ang usa ka 37-anyos nga dalaga kinsa giingong tigpayuhot og marijuana human sa gipahigayong buy bust operation sa kapolisan niadtong Miyerkules sa hapon diha sa sitio Mananga, barangay Tabunok sa nahisgutang siyudad.

Ang suspetsado kinsa mag-atubang sa kasong kalapasan sa Akta Republika 9165 kon “Comprehensive Dangerous Drugs Act” mao si Jessica Bayno alyas “Seking”, residente sa nahisgutang lugar.

Sa gipahigayong buy bust operation nila ni Senior Inspector Isagani Abalo, PO3 Rey Bucao, PO3 Benedicto Lasque, PO2 Erwin Denila ug PO2 Roy Lonfranco si Bayno ang nasakmitan sa maong mga polis og ¼ kilo nga pinaugang dahon sa marijuana nga gisulod sa usa ka container, ½ kilo nga mga pinaugang punoan sa marijuana, usa ka linikit nga marijuana nga maoy gitunol sa suspetsado ngadto sa poseur buyer bugti sa P50 nga marked money, laing napulo ka linikit nga marijuana, usa ka gamay'ng pakete nga dunay mga papel alang sa paglikit og sigarilyo ug timbangan.

Si Bayno ang giingong nadungog na nga tigbaligyaan og mga marijuana hinungdan nga gipanid-an kini sa mga polis una gipahigayon ang operasyon.

Kagahapon si Bayno gipasakaan og kaso kabahin sa nahisgutang kalapasan ngadto sa Talisay City Prosecutor’s Office. – BANAT NEWS