Arroyo - Villar Alliance gibutyag sa Liberal-Cebu

CEBU, Philippines - Ang mga opisyal sa Liberal Party dinhi sa Sugbo miakusar kang Pres. Gloria Macapagal-Arroyo nga nakig-alayon kang Senador Manny Villar hinungdan nga wala kini matandog sa kontrobersiya sa C-5 road extension project.

Sumala pa ni kanhi Social Welfare Secretary Dinky Soliman ug kanhi Defense Secretary Avelino “Nonong” Cruz kinsa mibisita dinhi sa Sugbo pagtambong sa paglusad sa Aquino-Roxas Volunteer, Cebu Bantay Balota sa Sacred Heart Center, nga naklaro na nila nga ang tinuoray nga gipaluyohan ni Pres. Arroyo mao si Villar ug dili ang administration standard bearer nga si Gilbert Teodoro.

“Lumalabas na ang katutohanan na ang talagang magkakampi ay si Villar at si GMA. Sino ang kandidato ni Villar sa Capiz? Si Jocjoc Bolante. Sino si Jocjoc Bolante? Best friend ni FG (first gentlemen Miguel Arroyo), kasama ni FG sa Rotary, and by the way hindi pa napapaliwanag ang fertilizers scam. Sino ang nagpasalamat na hindi na-censure si Villar sa Senate? Si Garry Olivar, ang spokesperson sa Malacañang,” matud pa ni Soliman sa press conference kagahapon.

Nagduda si Soliman nga ang kadako sa kuwarta nga gigasto sa political advertisement ni Villar gikan sa presidente o sa mga tawo nga nagpaluyo kang Arroyo hinungdan nga gamay na lamang ang labaw ni Senador Noynoy Aquino sa mga naggawas nga survey sa tibuok nasud.

Apan sa iyang bahin si Cruz nagkanayon nga sa mosunod nga survey motaas na og balik ang rating ni Aquino kay nagsugod na ang political ad niini sa mga telebisyon ug ubang mga media outlet. Samtang si kanhi IBP-Cebu City Chapter president Atty. Democrito Barcenas nagkanayon nga wala sila maproblema sa rating ni Aquino dinhi sa Sugbo tungod kay taas gihapon ang gidaghanon nga nagsuporta kaniya ug ni Senador Mar Roxas dinhi sa Sugbo.

Gani migawas nga labaw si Aquino batok kang Gibo Teodoro sa gipahigayon nga in-house survey sa Kapitolyo nga ubos sa One Cebu Party ni Gob. Gwendolyn Garcia. Apan gitataw ni Barcenas nga dili lamang isulti sa gobernadora ang maong impormasyon.

Si Soliman mitumbok usab nga dili tinuod nga nahupas na ang “magic power” ni Cory Aquino hinungdan nga nagkahinay ang popularity rating ni Noynoy.

Matud pa ni Soliman nga ang magic power ni Cory Aquino anaa pa sa kasingkasing sa katawhan ilabi na dinhi sa Sugbo. Apan wala lamang kaayo kini magpagawas tungod kay busy ang mga tawo alang sa ilang panginabuhian.

Samtang si Cruz mipasabot nga ang gilusad nga Aquino-Roxas Volunteers ug Bantay Balota sa tibuok nasud dili kini paagi aron mabalik ang maayong rating ni Noynoy ug Mar kun dili ang pagpangita og 200 mil ka volunteers lukop nasud nga mobantay sa labing unang automated election.

Kini tungod kay dako ang ilang pagduda nga mahitabo ang “no election” o “failure of election” nga mosangpot nga walay maproklamar nga presidente hangtod sa pagka-senador ug ang mga kongresista lamang nga may posibilidad nga mangulo na usab sa kongreso si Arroyo nga nagpapiling kongresista sa Pampanga ug magpabilin sa gahum. - Chester Abadilla (BANAT NEWS)