DepEd nahinogon sa noodle project gikanselar

CEBU, Philippines - Nahinogon si Department of Education-7 regional director Recarido Borgonia sa kinalitkalit nga pagkanselar sa 45 noodles project sa maong ahensya.

Matud ni Borgonia nga tungod sa pagkanselar sa proyekto, daghan sa mga tinun-an sa kinder ug grade one nga mga kabus gikan sa rehiyon siyete ang nahikawan sa kahigayonan pagkaon og noodles nga puno sa nutrina.

Si Borgonia mitataw nga apil sa 400 mil ka mga benepisyaryo nga apil sa 45 noodles program sa DepEd mao ang mga tinun-an gikan sa mga munisipalidad sa lalawigan sa Bohol, Cebu ug Negros Oriental nga dunay tag-as nga kaso sa malnutrisyon.

Sa nasayran, gipa-imbestigar sa Senado ang maong proyekto human adunay usa ka magpapatigayon mipasangil nga gipatas-an ang presyo sa noodles ug labaw sa tanan dili pa gyud tinuod nga adunay igong bitamina ug minerales sama sa gipasalig niini. Si Borgonia miingon hinuon nga ang DepEd nakakuha og legal nga opinyon nga mipabor sa maong proyekto gikan sa Government of Justice Procurement Policy Board, apan nagtuo kini nga mas maayo pang gikanselar ra usab ang maong proyekto kay nakahatag kini og dili maayong imahen ug dili na kini maayong ipatuman sanglit namansahan kini og pasangil sa kahiwian.

Samtang sa pikas bahin, gipahibalo ni Borgonia nga ila karong gipalig-on ang pagpatuman sa pre-school program. Subay ning maong programa, ang DepEd migahin og P1.8 bilyones alang sa 2010 pre-school program nga makatabang sa 900 mil ka mga kabataang enrollees.

Matud ni Borgonia nga naumol kining maong programa agi’g tubag sa ubos kaayong resulta sa mga tinun-an sa grade one nga miapil sa reading assessment niadtong milabay’ng katuigan.

Samtang giawhag usab sa direktor ang mga ginikanan nga ipa-enroll sa pre-school ang ilang mga anak nga nagpangidaron og 5-anyos. - Rey B. Pasaporte (BANAT NEWS)