PIDMB palig-onon

CEBU, Philippines - Palig-onon sa kapolisan sa lalawigan sa Sugbu ang Provincial Investigation and Detective Management Branch (PIDMB) alang sa ilang pag-imbestigar sa mga krimen ug pagpanakop sa mga kriminal.

Kini maoy gipahibalo ni Sr. Supt. Erson Digal, direktor sa kapolisan sa lalawigan sa Sugbu, nga ang upat ka mga imbestigador sa PIDMB nga gipanguluhan sa hepe nga si Insp. Ruben Cuizon iyang padungagan aron maabot sa kapin sa napulo ka personnel.

Si Digal miingon nga iyang kuhaon kadtong mga polis nga dunay background sa pagtungha sa abogasiya nga nadestino sa ubang police station ug maoy iyang kuhaan aron ipaubos sa training isip mga bag-ong imbestigador sa PIDMB.

Matud pa niini nga pinaagi sa maong lakang mapadali ang imbestigasyon sa PIDMB. Samtang ang mga personnel nga maglangkob niini dili lang mosentro sa imbestigasyon kun dili mga operatiba usab sila nga sila’y modakop sa mga kriminal, sama sa gipatuman sa City Investigation and Detective Management Branch (CIDMB) sa CCPO.

Hinuon kadtong mga police station nga iyang gipanguhaan og mga polis nga dunay background sa abogasiya ug mga dunay kaalam sa imbestigasyon iya gihapong hulipan og mga personnel aron dili maparalisar ang operasyon. - Guam Logrono (BANAT NEWS)