Mipatay sa tanod gikonbikto

CEBU, Philippines - Gikonbikto kagahapon sa kasong pagpatay ang usa ka akusado nga mipusil patay sa usa ka barangay tanod nga tig-paabang usab og lantay sa Carbon Public Market dinhi sa siyudad niadtong tuig 2006.

 Ang gikonbikto ni RTC-7 Branch 18 Judge Gilbert Moises sa kasong murder mao si Junie Domingo, 26 , ulitawo apan may ka-live-in partner, usa ka vegetable vendor ug nagpuyo sa 3rd Unit, Carbon Market, barangay Ermita, sa siyudad sa Sugbo. Apan giabsuwelto hinuon ni Judge Moises ang laing kaubang akusado nga si Camilo Vigas kinsa giingong kauban ni Domingo sa pagpusil niini sa biktima nga si Raul Alfeche, usa ka barangay tanod sa barangay Ermita ug nagpaabang usab og lantay nga kawayan sa merkado, gumikan sa pagkakuwang og ebidensya.

 Si Judge Moises mipahamtang og silot kang Domingo nga mabilanggo sulod sa tibuok kinabuhi ug pagbayad sa pamilya ni Alfeche og P75 mil isip civil indemnity, P50 mil, isip moral damages, ug P25 mil isip intemperate damages.

 Si Judge Moises mihatag og gibug-aton sa duha ka mga testigos nga sila si Pablo Sumalinog, 45, minyo, nga taga Lawis, Pasil, dakbayan sa Sugbo, ug Dominador Inot, 54, minyo nga taga barangay Bulacao, ning mao gihapong dakbayan, kinsa pulos mga kargador sa Carbon Public Market nga miila kang Domingo nga mao gyuy ilang nakit-an nga mipusil kang Alfeche didto sa sulod sa Unit 2 sa Carbon Market niadtong Mayo 28, 2006 sa hapon.

 Nasayran nga ang biktima gikang nagduwa og majong ug mipauli na unta kini kay mag-atiman sa iyang gipaabangang mga lantay dihang gipusil kini sa suspetsado.

Nasabak sa tangkugo ang biktima nga maoy hinungdan sa hinanaling kamatayon niini.

 Si Domingo ug ang kaubang nga si Vigas nasikop ra usab dayon   pagkasunod adlaw tungod sa pagtug-an sa mga testigos. – BANAT NEWS