Kapitan gi-ronda pasilotan sa DILG

CEBU, Philippines - Hugot nga gisuportahan   sa direktor sa Philippine Drug Enforcement Agency (PDEA-7) ang awhag ni Dangerous Drugs Board Undersecretary Clarence Paul Oaminal nga ipasuspenso sa Department of Interior and Local Government (DILG)-7 si Kapitan Marianito Yaon sa barangay Antipolo, lungsod sa Medellin.

Si Yaon padayong gipangita sa kapolisan human miikyas niadtong Martes sa hapon samtang gironda ang iyang panimalay sa mga polis pinanguluhan ni Sr. Insp. Bonifacio Arriesgado subay sa search warrant nga giluwatan ni RTC Judge Antonio Marigomen tungod sa paghupot og dili lisensiyadong armas.

Nakuha sa balay ni Yaon ang usa ka granada, usa ka .357 nga kalibre sa armas ug duha ka paketeng shabu ug paraphernalia.

Sayo niini, unang nadakpan si Yaon niadtong Oktobre sa Mandaue sa dihang naaktuhan sa mga otoridad nga nagsuyop og shabu sulod sa iyang sakyanan.

Si DILG-7 regional director Pedro Noval namahayag nga dili sila makasuspenso kang Yaon sanglit walay reklamante batok sa kapitan.

Apan si PDEA-7 director Randy Pedroso nagkanayon nga dili na kinahanglan pa’ng magpaabot si Noval og reklamante batok sa kapitan gumikan sa kasong giatubang ni Kapitan Yaon.

Si Pedroso miingon nga dunay memorandum ang DILG nga One Strike Policy ilabi na niadtong mga barangay opisyal nga malambigit sa tanang ilegal nga kalihukan ilabi na ang shabu.

Gibutyag ni Pedroso nga gawas kang Yaon duna pay daghang mga opisyal sa barangay dinhi sa rehiyon siete nga nalambigit sa ilegal nga gi-monitor sa PDEA-7.

Matud ni Pedroso nga anaa sa ilang watchlist si Kapitan Yaon. Gani, adunay gihimong subsob nga surviellance batok niya niadtong miaging tuig apan nadakpan kini sa mga sakop sa Provincial Intelligence Branch (PIB) sa Mandaue samtang nagsuyop og shabu. – BANAT NEWS