Leyson di dawaton sa konseho

CEBU, Philippines - Wala mahinangop ang konseho sa dakbayan sa Talisay nga si kanhi konsehal Gabriel Leyson sa dakbayan sa Sugbo maoy ihulip sa nabakanteng puwesto sa konseho human molingkod nga pormal si Bise Mayor Alan Bucao sa maong katungdanan niya karon.

Kini sa dihang opisyal nga mibiya sa maong katungdanan si kanhi bise mayor Lani Abarquez niadtong Decembre 31, 2009.

Nabakante ang konseho tungod kay si Bucao mao may numero unong konsehal sa dakbayan ug walay natudlo nga ihulip sa nabakanteng puwesto sa konseho karon sa iyang pagkahimong bise mayor.

Si Konsehal Rodolfo Cabigas nga nahinabi sa mga tigbalita mibutyag nga may nadawat silang report nga si Leyson mao kunoy giduso sa oposisyon nga palingkuron sa bakanteng puwesto karon sa konseho.

Apan matud ni Cabigas nga dili na angayan nga pulihan pa ang maong puwesto tungod kay nasuta man sa Department of Interior and Local Government (DILG) nga sulod sa usa ka tuig nga wala si Abarquez, wala man mapasagdi ang ilang mga trabaho ug gimbuhaton.

Hinuon midugang siya  nga ang gobernador sa lalawigan maoy adunay katungod sa pagtudlo sa ihulip diha sa konseho isip maoy appointing authority bahin niini.

Matud ni Cabigas nga subay sa balaod, nga ang kauban sa partido sa mga nakadaog nga kandidato maoy gitugotang molingkod sa nabakanteng puwesto.

Kahinumdoman nga si Leyson kinsa midagan sa pagka-mayor sa dakbayan sa Talisay niadtong piniliay sa tuig 2007, napildi kang kasamtangang Mayor Socrates Fernandez.

Matud pa ni Cabigas nga gumikan sa nagkaduol nga election wala nay higayon ang konseho sa pagtuki ning maong isyu.

Midugang siya nga ang gigahing suweldo sa buot ihulip sa nabakanteng puwesto sa konseho kun dili kini kahulipan, adto nalang kini ibutang sa savings sa siyudad. – BANAT NEWS