Tanod gitigbas kritikal kahimtang

CEBU, Philippines - Kritikal ang kahimtang sa usa ka tanod human kini gitigbas sa iyang silingan makadaghang higayon didto sa bukirang bahin sa barangay Conalom, lungsod sa Argao niadtong Domingo sa alas 3:30 sa hapon.

Si Genaro Albaran nakaangkon og daghang samad sa lawas ug ulo human matigbasi sa silingan nga si Jimmy Datulayta, 30, minyo ug usa ka mag-uuma.

Matud ni PO1 Bernard Banugon sa Argao Police Station sa dihang nahinabi sa Banat News nga si Albaran gikatahong nanulong sa pinuy-anan ni Datulayta nga miresulta sa ilang panaglalis.

Misangpot sa pagpanigbas ang init nilang lalis.

Si Datulayta daling misibat pahilayo human sa hitabo samtang si Albaran gihatod dayon sa mga silingan sa Isidro Kintanar Memorial Hospital apan gibalhin sa tambalanan sa dakbayan sa Sugbo. – BANAT NEWS