CEBU, Philippines - Gitugtan sa korte ang mosyon sa kontrobersiyal nga polis nga si SPO1 Adonis Dumpit nga dili bilanggoon sa Cebu City Jail ug ipabilin lang sa Criminal Intelligence and Detection Group (CIDG-7) sulod sa tulo ka adlaw.
Si RTC-7 Judge Ester Veloso nagkanayon diha sa iyang usa ka pahina nga kamanduan kagahapon sa hapon nga si SPO1 Dumpit magpabilin sa kustodiya sa CIDG-7 sulod sa 48-oras.
Ang mosyon ni SPO1 Dumpit gisang-at pinaagi sa iyang mosyon pinaagi sa iyang abogado nga si Atty. Pedro Leslie Salva.
Kini aron may igong panahon ang korte ug ang kapolisan pagpangita og pasilidad nga mabilanggoan ni SPO1 Dumpit samtang padayon pa nga gidungog ang laing mosyon sa prosekusyon pag-downgrade sa kaso gikan sa kasong murder ngadto sa kasong homicide.
Si Judge Veloso mihatag og 48 ka oras sa Office of the Ombudsman for the Military sa pagtubag sa maong mosyon ni SPO1 Dumpit.
Laing gimanduan ni Judge Veloso ang jail warden sa Cebu City Jail nga si Supt. Efren Nemenio aron pagkomentaryo usab sa mosyon ni SPO1 Dumpit ingon man ang paghatag og rekomendasyon sa korte ug usa ka jail facility samtang padayon nga gidungog sa korte ang kaso sa naasoy’ng polis.
Usa sa rason nga gibasehan ni SPO1 Dumpit nga dili kini mabalhog sa Cebu City Jail nga nahimutang sa barangay Kalunasan ning siyudad sa Sugbo mao nga dili kini matipon sa mga kriminal nga napabilanggo ni SPO1 Dumpit tungod sa nagkadaiyang kaso.
Si SPO1 Dumpit gidala sa iyang labaw nga opisyal nga si Supt. Rex Derilo, hepe sa Regional Security Agency Guard Supervisory Unit human kini mitahan niadtong Lunes sa buntag sa boundary sa Bukidnon ug Davao city.
Hugot nga seguridad ang gipatuman sa pagdala kang SPO1 Dumpit ngadto sa korte kagahapon sa hapon didto sa sala ni Judge Veloso.
Gawas sa mga elemento sa CIDG-7, gi-back-upan usab kini og mga mobile patrol group.
Si Dumpit sa pagpakighinabi sa media nitumbok nga masaligon siya nga mapaubsan ang iyang kaso gikan sa murder ngadto sa homicide ug tugotan siyang makapiyansa sa korte.
Si Supt. Derilo sa dihang nahinabi sa Banat News miingon nga dako ang iyang kalipay nga mitahan si SPO1 Dumpit kanila ug nagpaila kini nga matinahuron sa balaod.
Mibutyag usab si Derilo nga niadtong mi-leave si SPO1 Dumpit milahos kini sa iyang inahan nga nahimutang sa usa ka siyudad sa Mindanao. Samtang niadtong Biyernes nagpahibalo na si SPO1 Dumpit nga motahan pagka-Lunes. – BANAT NEWS