Posporo miugdaw sa 30 ka balay

CEBU, Philippines - Gibana-banang kapin sa P800 mil ang danyos sa nahitabong sunog nga giingong naggumikan sa posporong giduwaan sa mga bata, ug miugdaw sa 30 ka balay, kagahapon sa buntag didto sa sitio Isla Verde, barangay San Isidro, dakbayan sa Talisay.

Si SFO1 Cesar Dela Cerna sa Talisay City Fire Investigator sa pakighinabi sa Banat News,  mibutyag nga gawas sa 30 ka mga balay nga hingpit nga naabo, may lima pa nga igo lang nakan-an sa kayo.

Matud ni Dela Cerna nga ang kayo nagsugod sa balay sa magtiayong Carlito ug Jessel Lopez kinsa niadtong higayona pulos nanarbaho.

Samtang duha lang nila ka mga anak nga nagpanuigon og singko ug sayes-anyos ug ang unom ka buwan nga puya gidala sa yaya niini ngadto sa ilang silingan.

Sumala sa mga silingan , ang singko-anyos nga anak sa magtiayong Lopez, maoy giingong nagduwa og posporo nga maoy hinungdan sa sunog ug maayo na lang gani kay nakadagan kini dihang miulbo ang kayo.

Ang nahisgutang mga bata anaa na karon sa buhatan sa city social welfare tungod kay pareho pa kining gibati og kalisang.

Si Dela Cerna mibutyag usab nga wala’y naangol sa maong sunog gawas lang nila ni Rosalina Monina, 56, ug Lourdes Cabahug, 84 nga pulos ginerbiyos ug daling gidala ngadto sa Talisay City District Hospital.

Hinuon ang gwardiya sa tambalanan nga si Felicisimo Tikay mibutyag nga ang duha gipagawas dayon sa doktor.

Ang sunog nga gipaubos sa 3rd alarm gitabangan og pawong sa mga bombero sa dakbayan sa Mandaue, barangay Pardo sa dakbayan sa Sugbo, dakbayan sa Naga, Santo Nino Fire Volunteer ug Emergency Rescue Unit Foundation.

Matud pa ni Dela Cerna nga nadawat nila ang alarma sa alas 9:08 sa buntag ug nakontrolar nila ang kayo human sa 30 minutos .

Ang mga nasunogan temporaryong mipasilong karon sa kapilya sa ilang lugar ug sa ilawom sa tulay.

Sa laing bahin, ang konseho sa dakbayan sa Talisay mipasar dayon og resolusyon sa ilang sesyon kagahapon sa buntag nga nagdeklarar sa sitio Isla Verde nga ubos sa state of calamity.

Sa samang higayon   giawhag niini si Mayor Socrates Fernandez nga mogahin og P1 milyon nga budget gikan sa calamity fund aron ihinabang sa mga nabiktima sa sunog.  – BANAT NEWS