Gipusil sa silingan nabugan

CEBU, Philippines - Nasabak sa bugan ang usa ka shellcraft worker human kini pusila sa iyang silingan sa Alumnos, barangay Basak San Nicolas sa miaging hapon.

Ang biktima nailhan nga si Henry Cuevas, 29, nga taga Alumnos, samtang ang mga suspetsado nailhan nga sila si Jorge “Goryo” Labaya, Oliver Maglinte, usa ka Rosendo, ug laing duha ka wala hiilhing lalaki nga kuyog usab sa mga suspetsado.

Base sa taho ni Roldan Mabitag, nga maoy saksi sa pagpamusil nga samtang mipahuway sila gikan nga nagguyod sa usa ka sakayan, kalit lang silang giduol sa mga suspetsado.

Unya sa walay igong hinungdan kalit lang gitirohan sa ilang armas ang biktima ug nasabak ang bugan niini busa gihatod dayon ngadto sa Cebu City Medical Center.

Samtang ang mga suspetsado dali usab nga nangikyas human sa maong hitabo. Nakuha gikan sa crime scene mao ang usa ka kabhang sa wala pa hiilhing klase sa armas. Sa pakighinabi sa Banat News ni PO2 Jodan Batucan, kini nagkanayon  nga personal nga panagbangi ang hinungdan sa maong pagpamusil apan ila pa kining sutaon kun unsa ka tinuod.

Samtang padayon pa nilang   gipangita karon ang mga suspetsado nga nangikyas. (BANATNEWS)