Sakop sa Akrho na-comatose

CEBU, Philippines - Comatose ang kahimtang sa usa ka batan-on nga giingong miyembro sa Alpha Kappa Rho (AKRHO) human kini pusila sa wala hiilhing lalaki didto sa Salvador Extension, barangay Labangon, ning dakbayan sa Sugbo pasado alas 12:00 sa tungang gabii.

Ang biktima nailhan nga si Jino Cardoza, 22, nga taga Salvador Extension.

Sa pasiunang imbistigasyon sa kapolisan, nasayran nga samtang nagpalit og sigarilyo ang biktima sa usa ka tindahan sa ilang dapit kalit lang nga mipatim-aw sa iyang kilid ang mamumuno.

Unya kalit lang gipusil ang biktima sa walay igong hinungdan ug human sa panghitabo daling midagan ang mamumuno pahilayo sa maong dapit.

Samtang ang biktima dali usab nga gidala sa Cebu City Medical Center tungod sa grabi nga igo niini sa ulo.

Sa pakighinabi sa Banat News sa amahan sa biktima, kini masulob-ong misulti nga na-comatose iyang anak tungod kay ang utok sa biktima hapit na malugwa .

Giangkon usab sa amahan sa biktima nga ang iyang anak miyembro sa Alpha Kappa Rho .

Samtang si SPO4 Alex Dacua sa Homicide Section nagkanayon nga usa sa ilang gitan-aw nga anggulo sa maong hitabo mao ang away sa mga grupo sa fraternity   apan ila pang sutaon pag-ayo kun mao ba gayud kini ang hinungdan.

Samtang malaumon usab si Dacua sa usa ka menor de edad nga ilang giimbitar nga maoy makahatag kanila og lead kun si kinsa ug taga diin ang maong mamumuno. (BANATNEWS)