Interconnection sa Cemex, Veco tabang sa kulang kuryente

CEBU, Philippines - Maibanan na unya og gamay'ng kakulangan ang suplay sa kuryente sa Sugbo human sa gipahigayong ‘Ceremonial Switch-on’ sa CEMEX-VECO Interconnection kagahapon sa buntag diha sa APO Cement Plant sa barangay Tina-an,dakbayan sa Naga.

Si Atty. Darwin Mariano, Public Affair Director for Philippines and Asia sa pakighinabi niini sa mga tigbalita kagahapon miingon nga mobaligya sila sa ilang sobrang kuryente ngadto sa Visayan Electric Company (VECO) panahon sa buntag aron sila makatabang sa kakuwang sa supply sa kuryente ilabi na panahon sa gabii.

Ang CEMEX dunay kaugalingong diesel generator nga nagsuplay sa kuryente niini karon ug buot nilang baligyaan ang Veco sa sobrang 10 mega watts.

Si Normandy Chan, Deputy Plant Director sa APO Cement mibutyag nga ang ilang diesel powered plant dunay total capacity nga 66 mega watts (MW), 40MW lang maoy ilang gikinahanglan sa ilang planta sukad pa niadtong 1998.

Si Ethel Natera, Communication Officer sa Veco miingon nga ang 10 MW nga paliton sa buntag lamang sanglit inig ka gabii ang Cemex na usab maoy mopalit og 12MW nga kuryente tungod kay mas daku ang ilang gikinahanglang supply sa gabii nga operasyon sa planta.

Gipasabot ni Natera nga daghang mogamit og kuryente panahon sa buntag sa ilang konsumidor apan inig ka gabii momenus kini, gipasabot usab niyang panahon sa gabii barato ang presyo sa kuryente kompara sa buntag kay gamay lang ang demand.

Matud ni Natera nga ang 10MW gikan sa Cemex dako na kaayo og ikatabang sa kuwang nga supply sa kuryente, ang Metro Cebu nagkinahanglan og 350MW.

Sila si Gobernador Gwendolyn Garcia kinsa usa sa pinasidunggang dinapit uban nila ni Mayor Valdemar Chiong, Erramond Aboitiz, Chairman of the Board sa VECO ug Jaime Ruiz De Haro, President-CEMEX Asia maoy mipasiga sa switch sa pagbukas sa CEMEX-VECO Interconnection.

Si Kongresista Eduardo Gullas nga gidapit usab wala makatungha apan girepresentahan ni Atty. Paterno Acabodillo.

Ipatawag ni Cebu City Acting Mayor Michael Rama ang mga opisyal sa Visayan Electric Company (VECO) karong adlawa aron matino kung unsa ka seryoso ang kakulangon sa suplay sa kuryente.

“Nagpatawag ta og meeting to see if will there be a real alarm or will there be only a temporary especially nga we’re going towards campaign period,” sumala ni Rama.

Lakip sa ipatawag sa acting mayor atol sa nahisgutang tigom karong adlawa mao ang mga opisyal sa Comelec sa dakbayan aron usab pakisayran ang gihimo niining pagpangandam kung dunay mahitabong pagkapakgang sa sugang dagitabnon atol sa eleksyon.

Alang sa acting mayor, mahinungdanon ang himuong pagpangandam sa Comelec aron kini dili madudahan nga imaniobra ang piniliay.

Subay niini, ang gobernador usab misaway sa gihulagway niyang ‘over reaction’ sa mga negosyante kabahin sa power shortage tungod kay gihimo sa kagamhanan ang tanan aron masolusyonan ang problema.

Giawhag hinuon niya ang mga presidente sa nagkadaiyang mga chambers of commerce nga mokooperar pagkombinsir sa ilang mga sakop nga mopirma sa Uninterruptible Loading Sharing Agreement uban sa Kapitolyo ug sa VECO nga diin ang mga dagkong kompanya pagamiton sa ilang dagkong generators aron magamit sa ubang sector ang supply sa kuryente sa VECO sama sa mga yanong konsumidor. (BANATNEWS)