2 luhong sakyanan pormal gisakmit sa BOC

Nalutsan na og warrant of seizure and detention ang duha ka mga luhong sakyanan gikan sa Estados Unidos nga nasakmit sa mga sakop sa Customs Police sulod sa Cebu International Port (CIP) sa milabay'ng bulan sa Enero.

Pormal nang giluwatan og WSD ni Cebu Customs District Collector Ronnie Silvestre ang duha ka mga luhong sakyanan nga giingong gipanag-iya ni Mercy Grace Becker sa sitio Datag, barangay Maribago dakbayan sa Lapulapu.

Ang maong sakyanan naglangkob sa usa ka unit sa 2003 model Lincoln Navigator ug usa ka unit sa Kawasaki 1700 cc motorcycle nga gibanabana nga mokabat sa usa ka milyon kapin ka pesos.

 Matud pa ni ESS/ Customs Police District Commander Capt. Jerry Arizabal ang maong mga sakyanan miabot dinhi sa Sugbu niadtong Disyembre 10, 2009 luwan sa M/V Carla Rickmakers gikan sa Estados Unidos.

Gideklarar kini nga mga personal effects apan ilang nasuta nga adunay mga luhong sakyanan sulod sa 40-footer van dihang gisusi ni SA II Andre Catre.

 Matud pa ni Arizabal nga base sa taho ni Catre ang maong mga sakyanan walay BIS Authority to Import nga kalapasan sa Central Bank Circular 1389.

 Base sa WSD ni Silvestre niadtong petsa 25 bulan sa Enero tuig 2010 ang usa ka unit sa 2003 Lincoln Navigator maoy ubos pa sa WSD, samtang ang usa ka unit sa Kawasaki motorsiklo 1700 cc giembargo na pabor sa gobiyerno. (BANATNEWS)