Kap sa Pangan-an ikiha

CEBU, Philippines - Kapitan sa barangay Pangan-an sa isla sa Olango dakbayan sa Lapulapu posibleng mag-atubang og kasong "obstruction of justice" gumikan sa giingong pagtago niini sa mga suspetsadong mipatay sa usa ka lider sa kampo sa mga Radaza sa milabay'ng Sabado sa kaadlawon.

Matud pa ni Virgilio Casiao kanhi kapitan sa maong barangay ug uyuan sa biktimang si Nicasio Pogoy nga andam sila ni Catalina (asawa sa biktima) sa pagpasaka og kaso batok ni Pangan-an barangay Kapitan Climaco Tatoy Jr. nga giingong maoy midawat sa mga suspek.

Matud pa ni Casiao nga atol sa pagresponde sa kapolisan sa Olango human sa nahitabong pagpamusil ang mga suspetsado nga si Jerry Nanoy, Benigno Minguito, Joselito Milleno ug Arnulfo Pogoy nga maoy gitumbok nga maoy mipusil ni Necasio Pogoy misibat kini ug didto midangop ni Tatoy.

Apan dihang gisusi sa kapolisan wala kini dayon motug-an nga anaa sa iyang mga kamot ang mga suspetsado, diha lang kini angkon sa kapitan human pugsa sa mga polis hinungdan nga sila naaresto.

Samtang si SPO2 Rolito Jumao-as ang imbestigador sa Crime Against Persons Desk sa Lapulapu mipadayag nga ila pang tun-an ang maong kasong ipasaka ni Casiao ug Pogoy (asawa sa biktima) sa dili pa kini nila ipasaka ngadto sa piskaliya.

 Naghuwat usab si Jumao-as sa official report sa kapolisan sa Isla sa Olango kalabot sa maong insidente aron mahimong basehanan sa pagpasaka og kaso batok ni Kapitan Tatoy.

Kahinumduman nga atol sa usa ka disko sa Isla sa Pangan-an sa milabay'ng Sabado gipusil patay si Necasio Pogoy sa mga sakop sa barangay tanod nga miresponde sa panaglalis sa ilang gisuportahang kandidato pagkamayor sa dakbayan sa Lapulapu.

Giingong lunod-patay nga supporter ni incumbent mayor Arturo Radaza ang biktima.   (BANATNEWS)