'Ambush' sa Briton love triangle ang gisusi-CPPO

CEBU, Philippines - Love triangle ang gitumbok nga motibo sa kapulisan nga maoy hinungdan sa kamatayon sa duha ka mga batan-ong lalaking namatay sa may Trans-Central Highway sa barangay Cansumoroy lungsud sa Balamban niadtong Domingo sa hapon. Si Sr. Supt. Erson Digal, director sa kapulisan sa lalawigan sa Sugbu nagkanayon nga iyang nahinabi ang ginikanan sa duha ka mga biktima nga sila si Marlou Borja, 19, nga usa ka Filipino-American ug ig-agaw niining si Harold Flores ,17, nga pulos taga barangay Poblacion, Toledo City.

Gimandoan kagahapon ni Digal si Supt. Rodulfo Albutra ang pangulo sa Provincial Investigation Branch (PIB) sa pag-imbestigar sa British nga si Frank Richard Bell, 60, nagpuyo sa Nivel Hills, Lahug kinsa mi-report nga gi-ambush sila sa duha ka mga lalaking nagmotorsiklo.

Sumala pa ni Digal nga base sa iyang nakuhang impormasyon sa crime scene gisundan sa mga biktima ang sakyanan ni Bell samtang nagdagan sakay sa Kia Sorento YAZ -782 uban ang iyang asawa, anak nga babaye nga 4-anyos ingon man katabang.

Apan kalit lang mi-overtake ang mga biktima ug gipusil si Bell hinungdan nga maayong pagkatusak sa windshield niini, ang bintana duol sa driver, ingon man ang atubangan sa simbahan naigo sa bala, si Bell milahos sa buhatan sa PIIB nga dunay mi-ambush kanila.

Gipadayag niining gidasmagan niya ang mga suspetsado hinungdan nga nangalamba kini sa dalan ug nakahigayon pag-ikyas padulong sa kapolisan.

Si Digal nagkanayon nga ang ginikanan sa namatay nga si Borja mibutyag nga ang asawa sa British   nga si Juresa gikatahong dunay relasyon, ug ang British usab miangkong nakabantay kini nga may laing ka relasyon ang iyang asawa apan wala siya makaila niini.

Samtang giklaro ni Digal nga ang PNP-Crime Laboratory 7 lang maoy maka-determinar kun gipamusil ba ang mga biktima ug pagsusi sa samad sa agtang sa mga biktima kun gikan ba kini sa armas apan may nakuha sa crime scene nga lima ka kabhang sa .45 ingon man pul-an sa armas. Si Bell gipailawom na sa paraffin test kagahapon. (BANATNEWS)