Drivers palag sa arkabala

CEBU, Philippines - Mga habalhabal drivers sa lungsod sa Consolacion mireklamo ngadto sa Kapitolyo sa P10 nga arkabala nga gikolekta sa Consolacion Traffic Commission matag adlaw.

Matud pa ni Provincial Treasurer Atty. Roy Salubre nga nakadungog siya sa maong reklamo gikan sa pipila ka mga opisyal nga naminaw sa hangyo sa kapin sa usa ka libong drayber sa habalhabal sa lungsod sa Consolacion.

Si Salubre nagkanayon nga pipila na tuig nga gikolektahan ang mga drayber sa traffic enforcers sa CONTROCOM apan ang iresibo mao ang usa ka arkabala.

Sumala pa ni Salubre nga illegal ang pag-isyu sa arkabala ngadto sa mga drayber kay magamit lamang kini sa pagbayad og espasyo sa merkado publiko ug kun walay napasar nga ordinansa sa lungsod nga aprobado sa Hunta Probinsiyal. Sa iyang bahin, si Provincial board member Victor Maambong nga nakadawat usab sa maong reklamo mihulagway nga illegal ang pagpangolekta og arkabala.

Matud pa niini nga sulod sa dul-an 20 ka tuig niyang pagka provincial board wala siya makabantay nga may napasar silang ordinansa sa lungsod sa Consolacion nga nagtugot og pagpangolekta og P10 nga arkabala sa mga habalhabal drivers matag adlaw.

Kini ilabina nga ang mga traffic enforcers giingong makadawat og porsiyento sa ilang makolekta.(Chester Abadilla)

Survey nga 'tabla' ra si Atan ug Tomas gipakagamay lang ni VM Mike Rama

Nila ni Elly Bolonos ug Edwin Ian Melecio

Namunbon ang mga kandidato sa Kugi Uswag Sugbu (Kusug) sa usa ka survey nga gipahigayon sa Bando Osmeña Pundok Kauswagan (BOPK).

Kini maoy gibutyag sa standard bearer sa BOPK nga si acting mayor Michael Rama agi og reaksyon sa usa ka survey nga migawas niadtong miaging adlaw. Base sa resulta sa Cebu Research, labihang sikita ang panagribal sa mga kandidato sa duha ka partido nga mag-atbang sa umaabot nga eleksyon, apan miingon si Rama nga sa ila usab nga kaugalingong survey sa BOPK, labihang layoa ra ang ilang mga kaatbang.

Nagdumili hinuon ang acting mayor pagpagawas sa resulta sa ilang survey tungod kay kini giingong wala na kinahanglana.

Gipadayag sa acting mayor nga walay paglubad ang ilang pagtrabaho aron dili usab makalimot ang mga Sugbuanon pag-abot sa panahon.

Una nang gipasidan-an sa chairman sa Kusug, kanhi mayor Alvin Garcia, ang ilang mga kaatbang sa politika nga maningkamot sa pagpangampanya kay nagtoo siyang nagkahayag na ang ilang kadaugan sa nagkaduol na nga eleksyon karong buwan sa Mayo.

Wala hinuon makiglantugi si Garcia sa pasangil ni Mayor Tomas Osmeña nga usa lang ka propaganda sa ilang kaatbang sa politika ang nahisgutang survey. “Moingon sila og propaganda so be it, pero if I were them, hunahunaon nako pag-ayo and then I will take a counter steps,” matud ni Garcia.

Ang maong survey daan nang giklaro ni Roberto “Babbit” Ybañez nga gipahimo sa usa ka presidential aspirant ug dili sa lokal nga mga partido kini aron lang matino kun si kinsa ang mga lig-ong local candidates aron ilang maduolan inig sugod na unya sa kampanya.

Hinuon giklaro ni Ybañez nga dunay 30 ka tuig nga track record ang maong gikuhang Cebu based nga survey group nga wala lang mopokus sa political surveys tungod kay ang nag-unang surveys niini may labot sa komersyo o produkto, apan sa political scene, sagad sa ilang surveys mao gyud ang mogawas sa resulta sa eleksyon.   (Elly Bolonos ug Edwin Ian Melecio)   (BANATNEWS)