Dumpit mitahan sa kaugalingon

CEBU, Philippines - Mitahan na kagahapong adlawa didto sa Davao ang kontrobersyal nga polis nga si SPO1 Adonis Dumpit kinsa gikunsiderar nang wanted dinhi sa Sugbu tungod sa paglusot sa warrant of arrest batok kaniya may labot sa kamatayon sa usa ka gidudahang tulisan.

Sa interview ni DySS radio commentator Bobby Nalzaro kang Dumpit kagahapon mipasabot nga dili niya gustong maguba ang imahen sa Philippine National Police (PNP) maong siya mitahan.

Si Dumpit mitahan kang Supt. Rex Derilo, ang iyang immediate superior sa Regional Security Agency Guard Supervisory Unit kagahapon human mapupos ang tagal sa iyang leave of absence. Si Dumpit naluwatan og warrant of arrest sa sala ni Regional Trial Court (RTC) Judge Esther Veloso may kalambigitan sa kamatayon ni Ronron Go niadtong tuig 2004. Si Dumpit ug Derilo nanukad sa Cagayan de Oro airport padulong sa Mactan luwan sa usa ka abyon.

Matud pa ni Dumpit nga sa wala pa siya malutsi og warrant niadtong Enero naka-file na siya og leave hinungdan nga walay kamatuoran ang mga alegasyong nagtago-tago siya.

Samtang subli niyang gihimakak nga gituyo niya ang pagpatay kang Go tungod kay self defense ang iyang gihimo human siya giunhan og pusil sa grupo ni Go. Giangkon ni Dumpit nga silingan sila ni Ronron ug ang inahan niini nga si Janet Badana makadaghan nang higayon mangayo og tabang kaniya kay di na makontrolar si Ronron.

Si Dumpit off-duty na niadtong tungura apan gumikan kay dunay nagkinahanglan sa iyang serbisyo miresponde siya tungod kay kun dili siya usab maoy mapasakaan og kasong neglect of duty pasabot pa niini.

Gitambagan hinuon ni Dumpit ang mga kaubanan nga dili malisang sa iyang gidangatan karon.

 “Dili man angayan ma-discourage ang ubang polis kini tungod kay mao man gyud ni among trabaho ug apil usab kini sa among gipanumpaang responsibilidad isip usa ka polis,” matud pa niini.

Matud pang Dumpit andam niyang atubangon ang maong kaso ug wala siya mahadlok niini, iya usab gipasabot nga wala siya mabalakang ibalhog siya sa Cebu City Jail bisan paman og daghan kaayo siya og gipapriso.

Gihimakak usab ni Dumpit ang mga nanggawas nga report nga nag-escort pa gihapon siya kang Mayor Tomas Osmeña ug ang giingong paggamit kaniya ni Davao City Mayor Rodrigo Duterte pagpatay sa mga miyembro sa Anti-Communist movements nga gipangulohan ni Rep. Jun Alcover human ang naulahi misaway sa mayor sa pagdapig niini sa mga walhong pundok.

Human moabot sa tugpahanan kagahapon si Dumpit gidiretso kini og hatud ni Derilo sa buhatan ni Regional Director Lani-O Nerez kini aron pormal nga motahan sa iyang kaugalingon.

Nasayran nga si Dumpit mipadala og text message ngadto ni Cebu City Police Office director Sr. Supt. Patrocinio Comendador ug Nerez nga nangayo og pasaylo nga sila maoy gibasol nga wala siya masikop dayon.

Samtang ang abogado ni Dumpit nga si Atty. Pedro Leslie Salva sa mao gihapong interbyu nagkanayon nga wala pa niya masayri kun gi-aprobahan ba ang pag-downgrade sa kaso ni Dumpit gikan sa murder ngadto na sa homicide.

Apan sa report kagahapon, wala pa lihuka sa prosekusyon ang pag-downgrade sa maong kaso bisan duna nay resolusyon ang Office of the Ombudsman for the Military and Other Law Enforcement Offices nga nag-downgrade na sa kaso hangtud nga walay amended information.

Gitinguha usab sa abogado ni Dumpit nga sa Cebu City Police Office detention cell lang ibutang si Dumpit.   (BANATNEWS)