Duha ka minor namusil nadakpan

CEBU, Philippines - Ang duha ka mga menor de edad nga miluthang angol sa usa ka 19-anyos nga ulitawo didto sa barangay Guizo, dakbayan sa Mandaue sa miaging hapon, nadakpan dayon sa kapolisan.

Ang nagpahayahay na karon sa prisohan sa Mandaue ginganlan lang og Raymart ug Ryan, dili tinuod nilang ngalan nga nagpangidaron og   `16 ug 17 anyos, nga pulos taga Guizo.

Samtang ang giingong gipusil nila nailhan nga si Arnel Lucero, 19, ulitawo, nga taga Ibabao Estancia sa maong dakbayan.

Sumala sa kapolisan sa Presinto 5 sa Opao Police Station nga naglakaw sa karsada sa maong lugar ang biktima dihang kalit kining gipusil sa mga suspetsado nga wala'y igong hinungdan.

Si Nino Boncada, 20, nga maoy kakuyog sa biktima maoy nakasaksi sa maong pagpamusil ug mao usab ang miila sa duha ka mga suspetsado ug maoy nakapahibawo dayon sa kapolisan.

Sila si PO3 Eduardo Cabase, PO3 Carlos Zapanta ug PO2 Ricardo Quitaluna maoy dali nga nakatubag sa maong alarma ug mao usab ang nakadakop sa duha ka mga suspetsado.

Ang biktima gihatod dayon ngadto sa Vicente Sotto Memorial Medical Centetr sa dakbayan sa Sugbo. – BANAT NEWS