Supporter ni Radaza gipatay

CEBU, Philippines - Gipatay ang usa ka lider ni Lapulapu City Lone District congressional candidate ug incumbent Mayor Arturo "Boy" Radaza sa Isla sa Pangan-an, Olango Island dakbayan sa Lapulapu kagahapon sa buntag.

Ang biktima mao si Necasio Pogoy, 30, residente sa sitio Bonbon Isla sa Pangan-an sa Isla sa Olango dakbayan sa Lapulapu samtang ang gitumbok nga mga suspetsado mao sila si Jerry Nanoy sakop sa Lupong Tagapamayapa; Benigno Minguito nga mao ang chief Tanod; Joselito Milleno, barangay tanod ug ang duha ka mananagat nga si Arnulfo Pogoy ug Jonas Pogoy, mga residente usab sa maong dapit.

Matud pa ni Tanny Caballa, ig-agaw sa biktima nga samtang gikan sila nag-inom gumikan sa kapistahan sa maong dapit ug motambong unta sa usa ka disko kalit lang silang gipareglahan sa limaka mga suspetsado hinungdan nga mipauli nalang sila sa ilang panimalay.

Sa ilang paglakaw gikatahong gisundan sila sa mga suspetsado ug gipangkulata, matud pa ni Caballa armado sila si Nanoy, Minguito ug Milleno hinungdan nga wala nalang sila mosukol.

Sumala pa ni Caballa nga si Nanoy maoy mipusil ni Pogoy (biktima) tumong sa ulo niini hinungdan sa hinanaling kamatayon niini, samtang si Minguito nagpabuto usab sa iyang armas ngadto pataas.

Matud pa ni Catalina Pogoy, asawa sa namatay nga nagduda kining adunay bulok politika ang pagpatay sa iyang bana (Nicasio) gumikan kay ang mga suspetsado giingong mga supporter sa ilang kaatbang.

Matud pa ni Catalina daan nang nasuko ang mga suspetsado sa iyang bana kay maayo kining manulti ug mangombinsir sa mga tawo maong kini maoy gihimong lider sa partido ni Radaza.

Samtang ang lima ka suspetsado nasikop ra usab sa kapolisan samtang nagtago sa panimalay ni Pangan-an barangay kapitan Climaco Tatoy Jr.

Ang tigpamaba sa partidong DERETCHO ni Radaza nga si Nestor Ymbong atol sa usa ka press conference mipadayag nga ang maong hitabo mahulagway nilang paagi sa ilang kontra sa politika nga madeklarar ubos sa Comelec control ang dakbayan sa Lapulapu.

Matud pani Ymbong ang maong insidente susama ra og pattern nga gihimo aron mapugos ang Comelec sa pagluwat sa maong kamanduan.

Gihimong ehemplo ni Ymbong ang giingong plano kuno kaniadtong pagpusil kang DILG Usec. Lito Ruiz sa barangay Subabas-bas, pagbutang og duha ka tawong buot mopatay ni Harry Radaza atol sa usa ka Christmas party ug ang pagbanhig patay kang Allan Berame nga ang tanan mga posibleng mugna sa politika. Samtang padayon karon ang imbestigasyon sa kapolisan sa tinud-anay nga sinugdanan sa maong hitabo ug pagsusi kun ang kamatayon ni Pogoy may kalambigitan ba gyud sa politika.(BANATNEWS)