Polis nakombikto sa drug pushing
CEBU, Philippines - Usa ka kanhi polis sa siyudad sa Sugbu ang gikombikto sa korte sa kasong pagpamaligya sa ginadiling drugas upat na ka tuig ang nakalabay.
Ang gikombikto ni RTC-7 Branch 17 Judge Silvestre Maamo Jr. sa kasong kalapasan sa Sec. 5 Article II of Republic Act 9165 kon pagbaligya og shabu mao si PO1 John Rey Catiri, 37, lumad nga taga Rodriguez Extension, Cebu City kinsa nakuhaan og usa ka bultong shabu nga mitimbang og 59.50 ka gramos atol sa gipahigayong buy bust operation niadtong Hulyo 11, 2006.
Apan giabsuwelto hinuon ni Judge Maamo ang laing kaubang mga polis nga nasikop sa maong operasyon sa Criminal Intelligence and Investigation Branch kon CIIB nga si PO1 Aldwin Vicada nga nadestino gihapon sa CCPO.
Si Judge Maamo mipahamtang og silot ngadto kang PO1 Catiri nga mabilanggo sulod sa tibuok kinabuhi ug multa nga tunga sa milyon ka pesos.
Nasayran nga niadtong Hulyo 11, 2006 ang grupo ni Sr. Insp. George Ylanan mipahigayon og buy bust operation batok sa usa ka ‘Ednar’ nga mao si PO1 Catiri sa gawas nga bahin sa F. Llamas duol sa usa ka fastfood chain uban kang PO3 Wilma Abayan nga maoy nagsilbing pusher buyer dala ang P50 mil nga boodle money aron pagpalit og shabu.
Human gitunol ni PO1 Catiri ang shabu kang PO3 Abayan ug gidawat ang kwarta, gisikop dayon kini sa ubang mga CIIB. Apil sa gidakop mao ang iyang kaubang si PO1 Vicada nga naglingkod sa sulod sa maong kan-anan human gitudlo ni PO1 Catiri nga iyang kauban sa maong transaksyon.
Si Judge Maamo mihatag og gibug-aton sa ebidensiya sa prosekusyon ilabi na nga giangkon ni PO1 Catiri nga iyang gitunol ang drugas ug iyang gidawat ang kwarta sa polis nga nagsakay og taxi.
Apan wala na tagda ang pamahayag ni PO1 Catiri nga wala kini mahibawong shabu diay ang iyang gitunol ngadto sa pusher buyer ug igo lamang siyang gisugo sa iyang kauban nga si PO1 Vicada nga giingong maoy nakadawat sa text message sa pagpalit og shabu.
Ang mga sakop sa CIIB nakapakita usab og ebidensiya nga dugay nang nalambigit sa illegal nga drugas si PO1 Catiri gani usa kini sa hinungdan sa iyang absence without official leave (AWOL). – BANAT NEWS
- Latest
- Trending
