Misyon sa kapolisan sa Balamban legal

CEBU, Philippines - Usa ka legitimate nga operation ang gihimo sa kapulisan sa lungsod sa Balamban dihang ilang napusilan patay ang igsuon sa usa ka suspetsado sa pagpananom og marijuana nga nalutsan og warrant of arrest human kini milaban ug misukol sa mga warrant servers niadtong miaging adlaw sa barangay Matun-og.

Matud pa ni Sr. Supt. Erson Digal ang director sa kapulisan sa lalawigan sa Sugbu nga natural lang ang gihimo sa iyang mga sakop nga manalipod dihang giunhan sila pagpusil ni Rolito Abanto.

Si Abanto giingong mibabag sa mga polis nga dakpon ang iyang igsuong si Jelly Abanto nga gipasanginlang nananom og marijuana, nakaikyas niadtong tungura si Abanto.

Si Digal miingon nga bisan kun walay reklamo mopahigayon sila’g imbestigasyon sa ingon mahanaw ang mga pagduda nga overkill ang pagpusil nila ni SPO3 Allan Patalinghog ug mga kaubanan.

Giklaro usab niyang andam silang motubag kun duna may imbestigasyon nga mahitabo. - Guam Logroño (BANAT NEWS)