Gungob gikontra'g 3 ka kandidato

CEBU, Philippines - Si Mayor Avelino Gungob nga mikandidato sa pagkabise mayor sa lungsod sa Consolacion gi-alkontrahan karon sa tulo ka mga kandidato nga ubos usab sa laing partido.

Ang tulo mao sila si Konsehal Aurelio Damole, nga tandem ni kanhi Bise Mayor Teresa Alegado kinsa maoy standard bearer karon sa Liberal Party, Francisco Tumongja Jr. nga tandem usab ni Board Member Victor Maambong sa One Cebu Lakas CMD Kampi, ug Mary Anthent Mahusay nga tandem ni municipal administrator Jersson Marano sa Partido ng Masang Pilipino (PMP).

Hinuon si Mahusay nga kapikas sa kinabuhi sa beteranong magsisibya ug kumentaristang si Philip Mike Mahusay nga nahinabi sa Banat News miingon nga nagkadako karon ang kahigayonan nga mobalhin sila og partido gawas lang kun masulbad ang mga kakulian nga ilang nasinatian.

Si Mahusay miingon nga namatikdan niya nga tangtangon siya sa ilang grupo sa wala pa masayring hinungdan.

Hinuon matud pa niya nga bisan unsa pay mahitabo sa ilang partido nga PMP, sa gihapon magpadayon ang iyang kandidatura sa pagka - bise mayor sa nahisgotang lungsod sa umaabot nga piniliay. - Romeo T. Limpangog (BANAT NEWS)